49 DITË NË RRUGË, TANI VJEN HAPI I MADH/ Protesta nis regjistrimet për Kuvendin e Parë Kombëtar Qytetar

Pas 49 ditësh protestë në Tiranë, lëvizja qytetare po përgatitet të hyjë në një fazë të re, duke synuar të kalojë nga reagimi në rrugë drejt një organizimi më të strukturuar në nivel kombëtar.

Organizatorët kanë njoftuar hapjen e procesit të anëtarësimit dhe regjistrimit për Kuvendin e Parë Kombëtar Qytetar, një nismë që pritet të përcaktojë mënyrën se si protesta do të organizohet dhe do të përfaqësohet në vijim.

Sipas organizatorëve, Kuvendi synon të krijojë një strukturë përfaqësuese të qytetarëve, ku do të koordinohen kërkesat, qëndrimet dhe hapat e mëtejshëm të lëvizjes.

Nisma shihet si përpjekje për t’i dhënë protestës një formë më të qëndrueshme organizimi dhe për të zgjeruar përfshirjen e qytetarëve përtej tubimeve të deritanishme.

Por pyetja që mbetet e hapur është: A do të shndërrohet kjo protestë në një lëvizje të organizuar kombëtare, apo Kuvendi do të mbetet vetëm një tjetër nismë qytetare pa ndikim të gjerë?

Përgjigjja pritet të vijë me pjesëmarrjen dhe vendimet që do të merren në Kuvendin e paralajmëruar.