“Fluturoi” në ajër 50 metra nga përplasja/ 33-vjeçari shqiptar humb jetën në aksident

Viktima është Maksim Sinani, i cili nuk arriti t’u mbijetojë plagëve të rënda dhe ndërroi jetë gjatë natës në spital.

Sipas mediave italiane, Sinani po udhëtonte me motorin e tij Kawasaki Z1000 në drejtim të Pistoias, së bashku me një grup motoristësh, kur u përplas ballë për ballë me një Volkswagen Tiguan që po vinte nga drejtimi i kundërt.

Përplasja ishte jashtëzakonisht e fortë dhe si pasojë e goditjes, 33-vjeçari u hodh rreth 50 metra larg vendit të aksidentit.

Ai pësoi dëmtime të shumta në trup dhe plagë të rënda në njërën këmbë, ndërsa motori i tij u shkatërrua plotësisht.

Shërbimet e emergjencës mbërritën menjëherë në vendngjarje. Gjatë ndërhyrjes së mjekëve, Maksim Sinani ishte ende i vetëdijshëm. Ai u transportua fillimisht me urgjencë në spitalin San Jacopo në Pistoia, ku u stabilizua dhe u intubua.

Më pas, rreth orës 23:00, ai u dërgua me helikopter në Qendrën e Traumës në Careggi për trajtim të specializuar. Megjithatë, gjendja e tij u përkeqësua gjatë natës dhe, pavarësisht përpjekjeve të mjekëve, ai ndërroi jetë si pasojë e plagëve të marra.

Autoritetet italiane kanë nisur hetimet për të zbardhur rrethanat e plota të aksidentit.