“Mbylleni, mos flisni!”/ Braktiset takimi i Ramës në Poliçan

Takimi i kryeministrit Edi Rama në Berat, në kuadër të diskutimeve për Reformën Territoriale, është shoqëruar me debate dhe përplasje verbale me një përfaqësi qytetarësh të ardhur nga Poliçani.

Në takimin e zhvilluar në ambientet e një hoteli në Berat ndodhej edhe aktorja Egla Ceno. Situata u tensionua gjatë diskutimeve, duke bërë që përfaqësuesit e Poliçanit të largoheshin nga salla në shenjë proteste.

Takimi nisi me një prezantim nga Ministri i Pushtetit Vendor, Ervin Demo. Pas përfundimit të fjalës së tij, përfaqësues të Poliçanit kërkuan të merrnin fjalën për të paraqitur shqetësimet dhe qëndrimet e tyre lidhur me reformën.

Sipas të dhënave për ngjarjen, ndërhyrja e tyre u shoqërua me reagim të ashpër nga kryeministri Rama, i cili u kërkoi të mos flisnin në atë moment. Kjo solli debat mes Ramës, kryebashkiakut të Poliçanit, Adriatik Zotkaj, dhe aktores Egla Ceno.

Përplasja verbale vijoi për disa momente, ndërsa përfaqësia e ardhur nga Poliçani vendosi të braktisë takimin dhe u largua nga salla.

Takimi në Berat është pjesë e konsultimeve për Reformën Territoriale, ndërsa diskutimet pritet të vijojnë edhe me përfaqësues të tjerë vendorë dhe qytetarë.