Ish-ambasadori holandez Robert Bosch kritikon Brukselin pas vendimit të Hagës ndaj ish krerëve të UÇK-së

Qëndrimi i Bashkimit Evropian pas aktgjykimit të shkallës së parë ndaj katër ish-krerëve të UÇK-së ka hapur debat edhe në qarqet diplomatike.

Robert Bosch, ish-ambasador i Holandës në Kosovë, ka kritikuar deklaratën e BE-së, duke vlerësuar se Brukseli mund të kishte qenë më pak lavdërues ndaj Dhomave të Specializuara.

Sipas Bosch, ishte e pritshme që Bashkimi Evropian të kërkonte respektimin e vendimit të gjykatës, pasi vetë institucionet e Kosovës e kanë pranuar dhe mbështetur krijimin e saj.

Por, sipas ish-diplomatit holandez, kjo nuk e pengonte BE-në që të tregonte më shumë rezervë në vlerësimin e procesit gjyqësor dhe të merrte në konsideratë edhe rrethanat e luftës në Kosovë.

Bosch ka ngritur pikëpyetje edhe mbi strukturën komanduese të UÇK-së gjatë luftës. Ai ka argumentuar se NATO-ja kishte vështirësi në komunikimin me forcat në terren, pikërisht për shkak të asaj që e konsideron mungesë të një strukture të qartë komanduese.

Sipas tij, kjo rrethanë duhet të merret parasysh në vlerësimin e përgjegjësive individuale dhe të procesit gjyqësor.

Kritika e tij prek pikërisht një nga elementet më të debatueshme pas aktgjykimit: mënyrën se si vlerësohet përgjegjësia individuale në raport me strukturat e UÇK-së gjatë luftës.

Ndërkohë, Bashkimi Evropian ka mbrojtur qëndrimin e tij.

Zëdhënësi i BE-së, Guillaume Mercier, u ka bërë thirrje të gjitha palëve në Kosovë dhe në rajon të tregojnë përmbajtje dhe të shmangin çdo ndërhyrje ndaj institucioneve të drejtësisë.

Brukseli ka deklaruar se Dhomave të Specializuara dhe Zyrës së Prokurorit të Specializuar duhet t’u mundësohet të përmbushin mandatin e tyre në mënyrë të pavarur.

BE-ja e ka cilësuar procesin si të drejtë, të paanshëm dhe të pavarur, duke rikujtuar në të njëjtën kohë se të dënuarit kanë të drejtë ankese.

Kështu, ndërsa në Kosovë vazhdon debati për vendimin e Hagës, kritikat e Robert Bosch-it rikthejnë në qendër të vëmendjes edhe rolin e faktorit ndërkombëtar dhe mënyrën se si Brukseli e ka vlerësuar procesin e Dhomave të Specializuara.