Nga Milaim Zeka te Erion Braçe/ Bledi Mane zbulon 3 emrat e konkurentëve të “BBV Albania”

Teksa interesi për edicionin e gjashtë të “Big Brother VIP Albania” po rritet, gazetari Bledi Mane ka zbuluar disa prej personazheve që do të dëshironte të shihte në shtëpinë e reality show-t.

I ftuar në emisionin “She’s On Air” në Top Albania Radio, Mane u pyet se cilët emra do t’i konsideronte interesantë për formatin. Në listën e tij përfshiu gazetarin nga Kosova, Milaim Zeka, Helga Cakon dhe deputetin e Partisë Socialiste, Erion Braçe.

Një prej emrave të përmendur ishte Milaim Zeka. Sipas Manes, gazetari kosovar do të sillte një profil interesant dhe mund të krijonte dinamika të ndryshme brenda shtëpisë.

Mane përmendi gjithashtu Helga Cakon, vajzën e Alfred Cakos. Ai foli për një pjesëmarrje të mundshme të saj dhe për mënyrën se si kjo eksperiencë mund të shoqërohej edhe me reagimet e të atit jashtë shtëpisë.

Në listën e Manes ishte edhe deputeti socialist Erion Braçe. Gazetari tha se do të ishte interesante ta shihte atë në një realitet krejtësisht të ndryshëm nga politika, duke argumentuar se një format i tillë do të mund të shfaqte një tjetër anë të figurës së tij publike.

Megjithatë, emrat e përmendur nga Bledi Mane nuk janë konfirmime për kastin e “Big Brother VIP Albania 6”, por pjesë e preferencave dhe dëshirave të tij personale.

Ndërkohë, i pyetur nëse do të pranonte të rikthehej vetë në shtëpinë e “Big Brother VIP”, Mane e përjashtoi këtë mundësi, duke thënë se formati ka nevojë për personazhe të rinj.