TRUMP: PAS NENTORIT RIFILLOJME BOMBARDIMET

Presidenti amerikan Donald Trump ka refuzuar propozimin e Iranit për një armëpushim shtatëditor, i cili synonte ndalimin e luftimeve dhe rihapjen e Ngushticës së Hormuzit.

Sipas Wall Street Journal, propozimi iranian iu përcoll Uashingtonit përmes ndërmjetësve nga Katari. Plani parashikonte që, brenda shtatë ditësh, Hormuzi të rihapej për transportin detar, ndërsa palët të përgatiteshin për negociata më të gjera.

Në këmbim, Teherani kërkonte heqjen e bllokadës detare ndaj porteve iraniane, lehtësimin e sanksioneve mbi eksportet e naftës dhe zhbllokimin e aseteve iraniane të ngrira.

Propozimi përfshinte gjithashtu ndalimin e luftimeve në fronte të tjera të rajonit dhe nisjen e negociatave për programin bërthamor të Iranit pas përfundimit të armëpushimit.

Ministri i Jashtëm iranian Abbas Araghchi deklaroi në OKB se plani mund të zbatohej menjëherë nëse SHBA-ja do ta pranonte. Edhe presidenti iranian Masoud Pezeshkian tha se Teherani do t’i përmbahej marrëveshjes në rast të pranimit nga Uashingtoni.

Por administrata Trump, sipas Wall Street Journal, mbetet skeptike ndaj gatishmërisë së Iranit për të pranuar kërkesat amerikane lidhur me programin bërthamor. Uashingtoni gjithashtu nuk planifikon të heqë bllokadën detare, duke synuar të ruajë presionin ekonomik mbi Teheranin.

Ndërkohë, përpjekjet diplomatike mes dy vendeve vazhdojnë. Megjithatë, një takim treorësh mes zyrtarëve amerikanë dhe iranianë, i ndërmjetësuar nga Katari, nuk ka sjellë deri tani ndonjë përparim të rëndësishëm.

Sipas raportimit të gazetës amerikane, Trump u ka thënë bashkëpunëtorëve se pret që bombardimet ndaj Iranit të rifillojnë pas zgjedhjeve të mesmandatit në nëntor, duke e lënë situatën SHBA–Iran në një pikë të tensionuar.