QENDRUAM TE PAMPOSHTUR/ BERISHA: SOT KOHA NA THERRET TE RINGJALLIM VENDIN

Kryetari i Partisë Demokratike, Sali Berisha, ka deklaruar se opozita shqiptare ka kaluar një periudhë të vështirë, por sipas tij ka dalë prej saj më e fortë dhe më e konsoliduar.

Berisha tha se opozita gjatë këtyre viteve ka qenë, sipas tij, një zë i qytetarëve që kundërshtojnë qeverinë dhe një mbrojtëse e vlerave shoqërore e kombëtare.

Ai theksoi se demokratët nuk qëndruan në opozitë për interesa personale apo familjare, por për atë që ai e cilësoi si “dinjitetin njerëzor dhe kombëtar”.

“Shqipëria në këto vite pati një opozitë nga më të fortat, nga më aktivet. Shqiptarët patën një avokate të interesave të tyre”, deklaroi Berisha.

Por kreu i PD-së e zhvendosi fokusin nga bilanci i së kaluarës tek ajo që e cilësoi si një fazë të re politike.

“Koha sot na thërret të ripërtërijmë Shqipërinë”, u shpreh ai, duke bërë thirrje për largimin e qeverisë nga pushteti.

Berisha e cilësoi qeverisjen aktuale si “të keqen e madhe” dhe tha se opozita duhet t’u japë përgjigje problemeve që, sipas tij, rëndojnë mbi qytetarët.

Në fjalën e tij, një pjesë të rëndësishme zuri edhe gjendja ekonomike. Berisha u ndal tek pensionistët, duke pretenduar se rritja e çmimeve ka ulur ndjeshëm fuqinë e tyre blerëse dhe se shumë prej tyre përballen me vështirësi për të siguruar edhe ilaçet.

Ai foli gjithashtu për të rinjtë dhe emigracionin, duke argumentuar se pagat dhe kostot e jetesës, veçanërisht qiratë në Tiranë, po i shtyjnë të rinjtë të largohen nga vendi.

Sipas Berishës, sfida e opozitës në këtë fazë nuk është më vetëm qëndrimi përballë qeverisë, por “ripërtëritja e Shqipërisë” dhe rikthimi i besimit tek qytetarët.