Rajon
E la vajzën 3-vjeçare të vdiste në det, nëna dënohet me burgim të përjetshëm
Një gjykatë në Athinë ka dënuar me burgim të përjetshëm një 33-vjeçare me origjinë algjeriane, të shpallur fajtore për vrasjen e vajzës së saj trevjeçare, Xhena, trupi i së cilës u gjet në det në plazhin Edem, në zonën e Paleó Faliro, në korrik të vitit 2025. Përveç dënimit maksimal, ajo u dënua edhe me tre vite burg për dhunë në familje.
Vendimi u shpall më 18 nëntor 2026. Trupi gjykues e shpalli njëzëri fajtore për vrasje me dashje, duke mos i njohur asnjë rrethanë lehtësuese.
Gjatë procesit gjyqësor, 33-vjeçarja mohoi se kishte vrarë të bijën. Ajo pretendoi se vogëlushja ishte rrëzuar në banjë, kishte goditur kokën dhe më pas kishte shfaqur konvulsione. Sipas versionit të saj, kishte menduar se fëmija kishte vdekur dhe, nga frika se mos humbiste edhe fëmijët e tjerë, kishte vendosur ta linte trupin në det.
“Unë nuk jam vrasëse, nuk e vrava fëmijën tim”, deklaroi ajo në përfundim të dëshmisë, duke kërkuar që të mos ndahej edhe nga fëmijët e tjerë.
E pandehura pretendoi gjithashtu se vajza ishte keqtrajtuar më parë nga partneri i saj dhe se ditën e ngjarjes nuk ishte ndier mirë. E pyetur nga gjykata përse nuk kishte kërkuar ndihmë mjekësore apo nuk kishte njoftuar policinë, ajo u përgjigj se ishte frikësuar dhe ndodhej në gjendje shoku. Ajo tha se vendimin për ta lënë fëmijën në det e kishte marrë edhe duke u bazuar në bindjet e saj fetare.
Prokurorja kërkoi dënimin sipas akuzave, duke argumentuar se vogëlushja ishte ende gjallë kur ishte lënë në ujë dhe se veprimi nuk kishte qenë aksidental. Në mbështetje të qëndrimit të saj, ajo paraqiti ekspertizat mjeko-ligjore, analizat histologjike, pamjet e kamerave të sigurisë dhe dëshmitë e personave të pyetur gjatë hetimit.
Sipas prokurores, dëmtimet e konstatuara në trupin e fëmijës, përfshirë plagët dhe gërvishtjet, si dhe dëshmitë për raste të mëparshme të keqtrajtimit dhe neglizhimit, përforconin akuzën. Ajo hodhi poshtë pretendimin se përgjegjës për dhunën ishte vetëm partneri i të pandehurës, duke theksuar se nëna nuk kishte kërkuar ndihmë për vajzën.
Një tjetër element i përmendur gjatë procesit ishte kontakti i 33-vjeçares me ambasadën algjeriane në Athinë, vetëm dy ditë pas vdekjes së fëmijës. Sipas prokurores, ajo kishte kërkuar informacion për mënyrën se si mund të kthehej në vendin e origjinës. Gjithashtu, gjatë deklarimeve të saj kishte përmendur se kishte vetëm dy fëmijë, pa përfshirë vajzën që kishte humbur jetën.
Trupi i vogëlushes u gjet më 27 korrik 2025, duke pluskuar në ujërat pranë plazhit Edem. Ekspertiza mjeko-ligjore përcaktoi se shkaku i vdekjes ishte asfiksia nga mbytja, ndërsa në trup u konstatuan edhe dëmtime të tjera.