Vrau Arlinda Zekaj, arrestohet pas tre ditësh në arrati Albert Sylaj

Tre ditë pasi dyshohet se vrau ish-kunatën e tij, Arlinda Zekaj, policia ka arrestuar Albert Sylajn, i cili ishte në kërkim nga organet e rendit lidhur me vrasjen e rëndë që ndodhi më 25 tetor në fshatin Vitomiricë të Pejës.

Sylaj u arrestua pas një aksioni policor në zonën malore të Becit të Gjakovës, ku ishte lokalizuar pas disa ditësh në arrati. Në operacionin për kapjen e tij morën pjesë njësi të shumta policore, përfshirë njësitin special FIT.

Rasti kishte ndodhur të dielën mbrëma, më 25 tetor, kur Arlinda Zekaj dyshohet se u vra nga ish-kunati i saj, Albert Sylaj, me sëpatë, pak minuta pasi ishte kthyer nga stacioni policor.

Pas ngjarjes, Sylaj ishte larguar dhe Policia e Kosovës e kishte shpallur në kërkim. Gjatë ditëve në vijim, ai dyshohej se po përpiqej t’i shmangej arrestimit, ndërsa raportimet e fundit flisnin për lëvizjet e tij në Prishtinë dhe për mundësinë e largimit drejt Serbisë.

Fillimisht, i dyshuari kishte komunikuar me policinë përmes mesazheve, duke shprehur qëndrimin se nuk do të dorëzohej i gjallë. Megjithatë, më vonë, pasi ishte lokalizuar në zonën malore të Becit, ai raportohet se kishte shprehur gatishmëri për t’u vetëdorëzuar, por kishte kërkuar paraprakisht të bisedonte me familjarët.

Sylaj kishte komunikuar me vëllain e tij përmes interfonit, duke kërkuar dhjetë minuta kohë për të folur me familjen para dorëzimit.

“Vetëm 10 minuta të flas me familjen”, raportohet të ketë qenë kërkesa e tij.

Pas angazhimeve operative dhe hetimore, si dhe bashkëpunimit me qytetarët, Policia e Kosovës arriti ta lokalizojë dhe arrestojë të dyshuarin.

Arrestimi u konfirmua nga Policia e Kosovës, e cila bëri të ditur se Sylaj u kap rreth orës 23:40 në Deçan. Autoritetet kanë falënderuar qytetarët për bashkëpunimin dhe kanë theksuar se veprimet e mëtejshme procedurale do të ndërmerren në koordinim me organet kompetente të drejtësisë.