Marta Kos i dërgon mesazh Beogradit: Pa reforma nuk ka përparim

Komisionerja e Bashkimit Europian për Zgjerimin, Marta Kos, ka deklaruar se Brukseli është i gatshëm të mbështesë qeverinë e re të Serbisë në zbatimin e reformave të kërkuara për afrimin me BE-në. Megjithatë, ajo ka bërë të qartë se përparimi në procesin e integrimit do të varet nga rezultate konkrete në forcimin e shtetit të së drejtës dhe garantimin e standardeve demokratike.

Gjatë prezantimit të paketës së zgjerimit në Parlamentin Europian, Kos u ndal te zhvillimet politike në Serbi dhe bëri të ditur se kishte zhvilluar një takim me përfaqësues të Listës Studentore serbe, me të cilët kishte diskutuar për situatën në vend dhe procesin e integrimit europian.

Komisionerja theksoi se ndër prioritetet kryesore për Serbinë janë lufta kundër korrupsionit, garantimi i lirisë së medias dhe përmirësimi i marrëdhënieve me vendet fqinje. Sipas saj, Bashkimi Europian është i gatshëm të ndihmojë autoritetet e reja në ndërtimin e institucioneve të bazuara te shteti i së drejtës dhe parimet demokratike.

“Ne jemi të gatshëm të mbështesim qeverinë e re të Serbisë për të bërë gjërat e duhura, për të ndërtuar shtetin e së drejtës dhe për të garantuar parimet themelore demokratike”, u shpreh Marta Kos.

Një tjetër çështje që ajo e cilësoi të rëndësishme është rindërtimi i besimit mes Serbisë dhe vendeve anëtare të Bashkimit Europian. Sipas saj, përgjegjësia për këtë proces nuk i takon vetëm Beogradit, por edhe vetë institucioneve europiane, të cilat duhet të kontribuojnë në krijimin e një marrëdhënieje më të qëndrueshme.

Kos nënvizoi se vetëm përmes reformave të kërkuara dhe rikthimit të besimit mes palëve mund të krijohen kushtet për përparimin e Serbisë drejt anëtarësimit në Bashkimin Europian.