Alarmi i kuq: Grupe kriminale nga Elbasani, Durrësi dhe Vora po devijojnë protestën

Prania e efektivëve të policisë në civilë dhe mënyra e ndërhyrjes ndaj protestuesve kanë rikthyer debatin mbi atë se çfarë po ndodh në terren gjatë protestave kundër qeverisë.

Analisti Lavdrim Lita ngriti një pretendim të fortë, duke deklaruar se në protestë mund të jenë infiltruar edhe persona të lidhur me grupe kriminale.

Sipas Litës, informacionet për këtë fenomen, siç pretendon ai, disponohen edhe nga Policia e Shtetit dhe shërbimet informative.

“Është e vërtetuar tashmë që ka infiltrim të grupeve kriminale të Elbasanit, të Durrësit dhe të Vorës në protestë për të devijuar protestën”, deklaroi Lita.

Ai pretendoi se këta persona nuk janë thjesht pjesëmarrës, por sipas tij janë dërguar me një mision të posaçëm për të prishur dhe devijuar protestën.

Shqetësimin kryesor analisti e lidhi me praninë e personave pa uniformë, të cilët, sipas tij, ndërhyjnë mes protestuesve dhe kryejnë ndalime.

“Ka një shqetësim të drejtë për efektivët civilë që përfshihen në protestë midis protestuesve, sepse nuk dallohet mirë”, tha Lita, duke shtuar se në këtë situatë ekziston edhe rreziku që persona të lidhur me grupe kriminale të mund të marrin njerëz nga protesta.

Lita iu referua gjithashtu pamjeve të ndërhyrjeve gjatë protestave, ku persona me veshje civile janë parë duke ndaluar qytetarë, duke argumentuar se duhet të ketë një identifikim të qartë të tyre dhe të zinxhirit të përgjegjësisë.

“Njerëz civilë që arrestojnë civilë apo marrin peng civilë, kjo është antikushtetuese, është antiligjore dhe duhet të marrë fund një herë e mirë”, u shpreh ai.

Debati vjen pas tensioneve të regjistruara gjatë protestës së 8 shtatorit pranë Kuvendit. Rreth 20 protestues u shoqëruan nga policia, ndërsa një prej tyre u arrestua. Protesta u shoqërua me përplasje me efektivët dhe bllokim të rrugëve.

Sipas Litës, një tjetër skenar që duhet marrë në konsideratë është mundësia që persona të infiltruar të provokojnë përplasjen me policinë, me qëllim që më pas ndërhyrja e forcave të rendit të drejtohet ndaj gjithë protestuesve.

“Këto janë parë dhe dihen si skema për të prishur protestën”, deklaroi ai.

Në këtë pikë, analisti i bëri thirrje Policisë së Shtetit që të marrë masa për identifikimin e personave civilë që ndërhyjnë gjatë protestave dhe për të sqaruar se në çfarë cilësie veprojnë.

Lita kritikoi gjithashtu qeverinë dhe institucionet për atë që e konsideroi si mungesë vëmendjeje ndaj kërkesave të protestuesve.

Sipas tij, protesta ka pesë kërkesa kryesore, ndër të cilat qeveria tranzitore, ndryshimet lidhur me zonat e mbrojtura, shfuqizimi i Paketës së Maleve dhe, mbi të gjitha, dorëheqja e kryeministrit Edi Rama.

“Dorëheqja e Ramës është e padiskutueshme në kushtet… Ai mund të mos ta japë dorëheqjen, por ai nuk mund të qeverisë në këtë formë”, tha Lita.

Ai argumentoi se, pavarësisht numrit të pjesëmarrësve në protestë, kërkesat e qytetarëve duhet të dëgjohen dhe të trajtohen politikisht.

“Edhe një person që proteston për këto pesë kërkesa shumë të drejta” duhet dëgjuar, deklaroi analisti.

Kështu, ndërsa protestat vijojnë dhe përplasjet me policinë kanë shtuar tensionet, në debatin publik po ngrihen edhe pikëpyetje mbi identitetin dhe rolin e personave civilë që ndërhyjnë në terren, ndërsa pretendimet për infiltrim të grupeve kriminale kërkojnë verifikim dhe sqarim nga institucionet përgjegjëse.