Aspirina e qetësimit/ Bashkojuni Akordeve të Abrahamit, aleatët e SHBA përqeshin kërkesën e Trump

Thirrja e Presidentit të SHBA-ve, Donald Trump, që më shumë vende me shumicë myslimane të bashkohen me Marrëveshjet e Abrahamit, ka hasur në reagime skeptike dhe të ftohta nga aleatët e Washingtonit në Lindjen e Mesme.
Diplomatë nga vende të Gjirit e kanë cilësuar këtë kërkesë si jorealiste në kushtet aktuale rajonale, duke sugjeruar se ajo shërben më shumë për konsum politik të brendshëm në SHBA, se sa për një plan konkret paqeje.
Marrëveshjet e Abrahamit, të nisura gjatë mandatit të parë të Trump, synojnë normalizimin e marrëdhënieve mes Izraelit dhe disa shteteve arabe. Megjithatë, zgjerimi i tyre në këtë moment shihet si i vështirë, veçanërisht pas tensioneve të rritura në Gaza dhe konfliktit rajonal me Iranin.
Një diplomat i Gjirit u shpreh se ideja po përdoret si “mjet qetësues për bazën politike amerikane”, duke shtuar se nuk pritet të jetë pjesë reale e ndonjë marrëveshjeje për paqe.
Disa ish-zyrtarë amerikanë thonë se reagimi nga partnerët rajonalë ka qenë “mosbesim dhe frustrim”, ndërsa të tjerë e përshkruajnë si një “kushtezuese të papranueshme” për negociatat.
Sipas raportimeve, vende si Arabia Saudite kanë përsëritur se nuk do të vendosin marrëdhënie me Izraelin pa një rrugë të qartë drejt krijimit të një shteti palestinez, ndërsa shtete të tjera si Pakistani e kanë përjashtuar publikisht pjesëmarrjen në këto marrëveshje.
Në këtë kontekst, analistët vlerësojnë se kërkesa e Trump mund të shtojë tensione në një proces tashmë të brishtë diplomatik në Lindjen e Mesme, pa sjellë përparim real në negociata.