I duhej ndihmë, ia dhamë/ Ferit Hoxha: Shqipëria nuk do ta zgjasë marrëveshjen e emigrantëve me Italinë

Shqipëria nuk do ta zgjasë marrëveshjen me Italinë për qendrat e emigrantëve në Gjadër dhe Shëngjin përtej vitit 2030, ka deklaruar ministri për Evropën dhe Punët e Jashtme, Ferit Hoxha, në një intervistë ekskluzive për Euractiv.

Sipas Hoxhës, marrëveshja aktuale me qeverinë italiane është parashikuar të zgjasë pesë vite dhe nuk pritet të ketë një rinovim pas përfundimit të saj.

“Së pari, është për pesë vite dhe nuk jam i sigurt se do të ketë një zgjatje. Së dyti, nuk do të ketë zgjatje sepse ne do të jemi anëtarë të Bashkimit Evropian”, u shpreh ai.

Qeveria e kryeministres italiane, Giorgia Meloni, po përdor aktualisht strukturat në Gjadër dhe Shëngjin si qendra ndalimi për emigrantët që nuk kanë fituar azil në Itali, si pjesë e përpjekjeve më të gjera evropiane për të zhvendosur jashtë kufijve fizikë praninë e emigrantëve.

Marrëveshja pesëvjeçare u ratifikua në fillim të vitit 2024 dhe ka shoqëruar debate politike dhe sfida ligjore në Itali. Për të vijuar pas vitit 2029, do të nevojitej një zgjatje e re, vetëm pak muaj përpara afatit që Shqipëria synon për anëtarësimin në Bashkimin Evropian.

“Pasi Shqipëria të anëtarësohet, kjo nuk do të jetë më territor ekstraterritorial, por territor i Bashkimit Evropian”, tha Hoxha, duke iu referuar objektivit të Shqipërisë për anëtarësim deri në vitin 2030.

Në Itali, sfidat ligjore e detyruan qeverinë Meloni të ripërdorte qendrat, të cilat fillimisht ishin menduar si struktura pritjeje për emigrantët, duke i kthyer në qendra ndalimi për personat me kërkesa të refuzuara azili në pritje të riatdhesimit.

Megjithatë, në prill, marrëveshja mori një mbështetje të rëndësishme pasi një avokat i përgjithshëm pranë Gjykatës së Drejtësisë së Bashkimit Evropian dha një opinion jo-detyrues se skema është në përputhje me ligjin e Unionit.

Hoxha theksoi gjithashtu se Shqipëria ka mbetur një partnere e besueshme për Italinë, pavarësisht debateve.

“Italisë i duhej ndihmë. Ne ndihmuam. Dhe kjo nuk mund të harrohet”, deklaroi ai.