“Jemi gati për masa”/ Sekretari amerikan i Mbrojtjes paralajmëron Moskën: Rusia do ketë kosto

Sekretari i Mbrojtjes i SHBA-së, Pete Hegseth, tha të martën se SHBA-të dhe aleatët e saj do të marrin masat e nevojshme për të imponuar kosto ndaj Rusisë për agresionin e saj të vazhdueshëm nëse lufta në Ukrainë nuk përfundon. Sekretari i Mbrojtjes argumentoi gjithashtu se frenimi më efektiv ndaj agresionit të Rusisë është një NATO vdekjeprurëse, e aftë dhe e udhëhequr nga Evropa.

“Nëse na duhet të marrim këto masa, Departamenti i Mbrojtjes i SHBA-së është gati t’i ndërmarrë ato. Nëse na duhet të ndërmarrim atë hap, Departamenti i Mbrojtjes i SHBA-së është gati të bëjë detyrën e tij në mënyra që vetëm SHBA-të mund t’i bëjnë”, tha Hegseth gjatë një takimi të Grupit të Kontaktit për Mbrojtjen e Ukrainës, aleatit të Kievit, në selinë e NATO-s.

Ai tha se një ushtri ukrainase e besueshme në luftë do të duhet të jetë në gjendje të mbrojë veten dhe në këtë mënyrë të vazhdojë të pengojë agresionin rus përgjatë kufirit të NATO-s. Presidenti Trump ka ushtruar presion mbi aleatët evropianë që të vendosin sanksione më të ashpra kundër Rusisë, si një mënyrë për të ngadalësuar pushtimin e Ukrainës nga Kremlini. Muajin e kaluar, Komisioni Evropian propozoi paketën e 19-të të sanksioneve kundër Rusisë.

“Sanksionet tona janë të forta. Ato kanë një ndikim të dukshëm në financat publike dhe rritjen ekonomike të Rusisë. Bashkimi Evropian duhet t’i përforcojë këto përpjekje së bashku me partnerët e tij derisa të arrihet paqja”, tha në atë kohë Kaja Kallas, shefja e politikës së jashtme të BE-së.

Në SHBA, senatorët kanë siguruar më shumë se 85 bashkë-sponsorizues për një projektligj dypartiak për sanksione që do të penalizonte vendet që blejnë naftë, gaz dhe burime të tjera nga Rusia. Shtëpia e Bardhë ende nuk u ka dhënë dritën jeshile senatorëve për të vazhduar me legjislacionin.  Hegseth u tha aleatëve të NATO-s të mërkurën që të rrisin blerjet e armëve amerikane për Ukrainën.

“Paqen e arrin kur je i fortë. Jo kur përdor fjalë të forta ose tund gishtat, e arrin kur ke aftësi të forta dhe reale që kundërshtarët i respektojnë”, tha kreu i Pentagonit përpara takimit të tij me udhëheqësit e mbrojtjes të NATO-s.