Franca shtrëngon masat, Macron ndalon protestat, bizneset bëhen gati për ‘’luftë’’

Presidenti francez Emmanuel Macron ka paralajmëruar ndalimin e protestave të paligjshme në ditët në vijim, pas përleshjeve dhe plaçkitjeve të regjistruara gjatë fundjavës. Ai fajësoi grupet radikale të së majtës dhe personat që kryen akte vandalizmi për dhunën, ndërsa autoritetet po përgatiten për tubime të reja në disa qytete të vendit.

Pas një takimi me drejtuesit e shërbimeve të inteligjencës dhe ministrat e kabinetit, Macron deklaroi se protestat e organizuara nga sindikatat do të lejohen, por autoritetet mund të ndryshojnë itineraret për të mbrojtur bizneset dhe ndërtesat publike. Ndërsa për tubimet që nuk organizohen nga sindikatat, ai tha se do të kërkohet ndalimi i tyre aty ku kjo është e mundur.

“Rekomandimi i përgjithshëm është që në ditët në vijim të mos zhvillohen protesta”, u shpreh Macron, duke shtuar se për organizatat sindikale mund të propozohen itinerare alternative, ndërsa kufizimet për tubimet e tjera synojnë ruajtjen e rendit publik.

Në Paris, ndalimi i protestave është parashikuar të zbatohet deri në orën 20:00 dhe të përfshijë zonat pranë Pallatit Presidencial të Elizesë, dy dhomave të Parlamentit dhe stacioneve kryesore të trenave. Kufizimet shtrihen edhe në disa zona të qendrës së kryeqytetit që janë goditur nga plaçkitjet.

Masat vijnë në një kohë kur autoritetet franceze po përgatiten për protesta të reja, pas trazirave të rënda urbane të ditëve të fundit. Parisi, Lioni dhe Lila kanë vendosur gjithashtu ndalime për disa protesta të planifikuara, masa që kanë nxitur debate për kufijtë mes ruajtjes së rendit publik dhe të drejtës së qytetarëve për t’u tubuar.

Në disa zona ku situata është qetësuar, janë vendosur shtetrrethime gjatë natës. Megjithatë, grupe nxënësish dhe studentësh kanë deklaruar se do të vijojnë protestat, ndërsa për të shtunën është paralajmëruar një tubim i madh.

Ndërkohë, pronarët e bizneseve në Paris po marrin masa për t’u mbrojtur nga dëmtimet e mundshme, ndërsa disa kanë siguruar gaz lotsjellës dhe mjete të tjera mbrojtëse. Disa prej tyre shprehen se situata duhet të vihet nën kontroll, në të kundërt rrezikon të përshkallëzohet më tej.