Të shtëna me armë në një supermarket në Kiev, shkon në 7 numri i të vdekurve

Një person tjetër i plagosur në të shtënat e së shtunës në kryeqytetin e Ukrainës ka vdekur në spital, duke e çuar numrin e të vdekurve në shtatë, tha të hënën kryebashkiaku i Kievit, Vitali Klitschko.

Në një deklaratë në Telegram, ai tha se shtatë persona të plagosur mbeten në spitale.

Të shtunën, autoritetet lokale raportuan se gjashtë persona u vranë dhe 14 të tjerë u plagosën pas një të shtëne me armë zjarri në një rrugë dhe në një supermarket në lagjen Holosiivskyi të Kievit.

Prokurori i Përgjithshëm ukrainas, Ruslan Kravchenko, tha se autori i sulmit, të cilin ai e përshkroi si “me origjinë nga Moska”, hapi zjarr përpara se të barrikadohej në supermarket dhe të mbante pengje, pas së cilës policia hyri me forcë në ambientet e supermarketit, duke e qëlluar për vdekje.

Presidenti ukrainas Volodymyr Zelensky tha në kompaninë amerikane të mediave sociale X se autori i sulmit kishte lindur në Rusi dhe kishte banuar prej kohësh në rajonin e Donetsit, duke shtuar se ai ishte ndjekur penalisht më parë për vepra penale.

“Të gjitha informacionet e disponueshme rreth tij dhe motivet pas veprimeve të tij po hetohen plotësisht. Çdo detaj duhet të verifikohet”, tha ai.

Ndërkohë, Shërbimi i Sigurisë së Ukrainës tha se po e hetonte incidentin si një “akt terrorist”.