ORA 09:30, MOMENTI I TE VERTETES PER ERION VELIAJN

Gjykata e Lartë pritet të shqyrtojë sot çështjen që lidhet me masën e sigurisë ndaj kryebashkiakut të Tiranës, Erion Veliaj.

Sipas njoftimit zyrtar, shqyrtimi do të zhvillohet në dhomë këshillimi, në orën 09:30.

Çështja është rikthyer për shqyrtim pas vendimit të Gjykatës Kushtetuese, e cila ka kërkuar që të argumentohet nevoja e masës së arrestit në burg dhe arsyeja se përse nuk mund të aplikohet një masë më e lehtë.

Gjykata e Lartë pritet të vlerësojë kështu proporcionalitetin e masës së sigurisë, duke marrë në konsideratë edhe argumentet e Gjykatës Kushtetuese.

Ndërkohë, mbrojtja ndërkombëtare e Veliajt po përgatit një aplikim në Gjykatën Evropiane të të Drejtave të Njeriut në Strasburg.

Avokati britanik Ben Brandon ka deklaruar se mbrojtja e Veliajt pretendon se prej më shumë se 14 muajsh i është mohuar mundësia për të takuar klientin e saj.

Brandon e ka cilësuar paraburgimin e kryebashkiakut si “të panevojshëm dhe joproporcional”, duke kërkuar përfundimin e masës.

Në krahun tjetër, kreu i Grupit Parlamentar të PD-së, Gazment Bardhi, ka paralajmëruar se lirimi i Veliajt do të ishte, sipas tij, “funerali përfundimtar i Reformës në Drejtësi”.

Bardhi pretendon se Veliaj është marrë i pandehur për vepra që lidhen me korrupsionin, pastrimin e parave, fshehjen e pasurisë dhe shpërdorimin e detyrës.

Ai u ka bërë thirrje partnerëve ndërkombëtarë që të monitorojnë procesin, ndërsa ka akuzuar kryeministrin Edi Rama për përpjekje për të ndikuar në vendimmarrjen e gjykatës.

Sot, Gjykata e Lartë pritet të përcaktojë nëse masa e arrestit në burg ndaj Erion Veliajt do të mbetet në fuqi apo do të zëvendësohet me një masë më të lehtë.