Rama prezanton bonusin e ri të bebeve/ Sa para do të marrin familjet?

Kryeministri Edi Rama ka prezantuar një skemë të re të bonusit të bebeve, e cila parashikon mbështetje financiare mujore për familjet shqiptare për pesë vite pas lindjes së fëmijës. Sipas njoftimit të publikuar prej tij në rrjetet sociale, skema e re pritet të nisë zbatimin më 1 korrik 2027.

Vlera e përfitimit do të përcaktohet në bazë të numrit të fëmijëve në familje. Për fëmijën e parë, pagesa e parashikuar është 5 mijë lekë në muaj, që për pesë vite arrin në 300 mijë lekë.

Për fëmijën e dytë, mbështetja do të jetë 7 mijë lekë në muaj, ose 420 mijë lekë në total për pesë vite. Ndërsa për fëmijën e tretë, pagesa parashikohet të arrijë në 10 mijë lekë në muaj, duke e çuar përfitimin total në 600 mijë lekë gjatë së njëjtës periudhë.

Në postimin e tij, Rama e ka cilësuar skemën si një mbështetje të re mujore për familjet shqiptare. Megjithatë, njoftimi publik nuk jep detaje të mëtejshme mbi procedurat e aplikimit, kriteret e përfitimit apo mënyrën konkrete të zbatimit të skemës.