Përdhunoi të miturën, vihet në pranga 65-vjeçari

Një 65-vjeçar, Xhevair Veizi është arrestuar ditën e sotme në Lushnje pasi akuzohet për përdhunim të një të miture. Mësohet se i moshuari nga Berati kishte marrë një shtëpi me qira në Lushnje ku dyshohet se ka kryer aktin. Gjatë aksionit të policisë në banesë u gjetën gjithashtu edhe 4 krehëra arme zjarri si dhe municion luftarak. Po ashtu janë proceduar penalisht dy të tjerë për vepra të ndryshme penale.

Njoftimi i Policisë:

DVP Fier/Vihet në pranga 1 shtetas dhe procedohet në gjendje të lirë 1 tjetër, për vepra të ndryshme penale. Specialistët për Hetimin e Krimeve të Komisariatit të Policisë Lushnjë arrestuan në flagrancë shtetasin Xh. V., 65 vjeç, banues në Berat, pasi dyshohet se ka kryer marrëdhënie seksuale me një shtetase të mitur. Gjithashtu, gjatë kontrollit të ushtruar në banesën e marrë me qira nga ky shtetas, në Lushnjë, shërbimet e Policisë gjetën dhe sekuestruan në cilësinë e provës materiale 2 krehëra arme zjarri dhe municion luftarak.

Specialistët e Seksionit për Hetimin e Krimeve të DVP Fier referuan materialet në Prokurori dhe nisi procedimi në gjendje të lirë për shtetasin F. T., 55 vjeç, banues në Berat, pasi gjatë kontrollit në automjetin që drejtonte ky shtetas, shërbimet e Policisë gjetën dhe sekuestruan në cilësinë e provës materiale, një send të fortë (shkop bejsbolli). Materialet i kaluan Prokurorisë, për veprime të mëtejshme procedurale.
—
Paraditen e sotme, në fshatin Belinë, shtetasi I. Sh., 65 vjeç, duke drejtuar një automjet, ka humbur kontrollin dhe automjeti ka dalë nga rruga. Për pasojë, është dëmtuar shtetasi I. Sh., i cili ndodhet në spital, nën kujdesin e mjekëve. Grupi hetimor vijon punën për zbardhjen e plotë të shkakut të aksidentit.