Rezoluta antikorrupsion mori në seancën e sotme plenare votat e mazhorancës. Votimi i sotëm, për ish-presidentin Bamir Topi është një paradoks i madh nga i cili i fituari i vetëm është kryeministri Edi Rama.

I ftuar në “Ditari” nga Bruna Çifligu, ish-presidenti foli për një gjendje të mjeruar të opozitës, e cila i krijon kushte akoma më komode shumicës socialiste.

“Një avantazh i paramenduar, ekzekutuar sot nga kryeministri, për të hedhur në diskutim një temë që nuk askush nuk është kundër… por ajo vetë ka probleme të thella me korrupsionin.”

Sipas Topit, kryeministri sot është një lloj komoditeti që i krijon mundësitë që të mendojë se gjithçka mund të realizohet.

Ndërsa, duke u ndalur te turi i diasporës, ish-presidenti thotë se ato i shërbejnë garës së ardhshme elektorale.

“Qëllimi i kryeministrit sot është i tillë që, pas 11 viteve qeverisjeje, shfaqet me një model të ri: modeli i kontaktit me qytetarë shqiptarë. Në vetvete fsheh planin e tij për të filluar një fushatë ndryshe nga herët e tjera, për të tërhequr vëmendjen dhe për të kuruar imazhin.”

Teksa theksoi se emigrantët shqiptarë ia kanë dalë deri më sot të integrohen në shoqëritë e vendeve ku jetojnë me forcat e tyre, pa asnjë ndihmë nga shteti shqiptar, Topi shtoi se qeveria ka ende për të zgjidhur “hallet”  e shqiptarëve brenda vendit, e jo më pastaj të atyre që kanë emigruar.  Kjo vlen edhe për çështjen e pronave të çamëve.

Ndërsa, duke u kthyer nga politika e brendshme, për Bamir Topin, opozita ka asnjë ofertë për zgjedhjet e ardhshme, dhe synimi i vetëm për të ka mbetur që të “kapë institucionin e opozitës në zgjedhjet e ardhshme.”

I pyetur nëse do të pranonte një propozim të bërë nga grupi i Rithemelimit në një tryezë për Reformën Zgjedhore, apo për të ardhmen e opozitës, Topi u tregua i prerë.

“Jo. E para e punës ai debat, me përfaqësuesin e atij grupimi ka mbaruar në vitin 2008. Ka qenë ai dhe Edi Rama që bënë ndryshimet kushtetuese. Dhe nuk është problemi që shkatërruan demokracinë në partitë politike, por shkatërruan edhe raportin midis institucioneve.”

Për Bamir Topin, opozita sot është një anije e fundosur.

Neritan Sejamini thotë se rezoluta dhe komisioni kundër korrupsionit që ka propozuar Edi Rama, është në fakt nisja e një serie reformash që ai do të propozojë për integrimin e Shqipërisë në BE në vitin 2030, një operacion edhe propagandistik që do t’i shërbejë Ramës për të rishpikur veten në zgjedhjet parlamentare.

I ftuar në emisionin “Të Paekspozuarit” në MCN TV, Sejamini tha se Rama është “dhjetë hapa larg të tjerëve” dhe ka një projekt serioz për të fituar zgjedhjet, përfshirë edhe marrjen e profesionistëve nga Perëndimi, ndërsa opozita nuk përdor trurin dhe nuk ka asnjë strategji.

“Që të gjykojmë rezolutën duhet të gjykojmë motivimet dhe interesat e zotit Rama. Rezoluta po përcillet në mënyrë kaotike. Rezoluta është një mjet, nuk është asgjë. Zoti Rama do të bëjë një komision të posaçëm parlamentar dhe ky komision i posaçëm do të rishikojë shumë institucione të pavarura, të gjejë probleme dhe do të vijë me reformë të re, që do të reformojë shtetin shqiptar për ta bërë gati për tu futur në BE në vitin 2030. Kështu filloi edhe reforma në drejtësi.

Ka gjetur këto terma, përgjithësime të shkëlqyera, të gjithë duan drejtësi dhe luftën kundër korrupsionit, sepse nuk mund të dalësh kundër kësaj edhe opozita abstenoi sot. Ka gjetur luftë të re, mjet propagandistik, ndaj të cilëve nuk del askush kundër. Do të marrë ekspertë, edhe të huajë dhe në fund do të propozohen ato ndryshime që Rama ka në mendje.

Pra, zoti Rama do të bëjë disa gjëra. Do që mandate i kryetarit të SPAK të kalojë në dy, pra ai që të vijë pas Dumani të rrijë gjashtë vjet dhe jo tre. E dyta, ai do të ndajë termin që nëse bëhet fjalë për shpërdorim detyre pa dëme financiare, të hetohet nga prokuroritë e rrethit. Pra vetëm kur shkakton dëme nga shteti, të hetohet nga SPAK. Pra hetimet që ka nisur sot vetëm shpërdorim detyre, 90% e rasteve kundër zyrtarëve, do ti hetojë prokuroria e Tiranës.

Ka një element propagandistik për fushatën. Zoti Rama e ka menduar dhe është efikase. Ai thotë, korrupsioni është kancer i trashëguar. Ne duam ta luftojmë korrupsionin, bëjmë ligje dhe reforma. Ne e kemi filluar luftën para dhjet vitesh me reformën ne drejtësi dhe sot SPAK, që nga viti 1912, kemi një institucion që po nxjerr para drejtësisë shtetarët e korruptuar dhe kjo është arritja jonë. Tani thotë, meqenëse e bëmë drejtësinë, duhet të bëjmë integrimin ne BE dhe do ta bëjmë njëlloj me shtetbërje. Unë do të ngre flamurin shqiptar te oborri i BE. Kjo është e logjikshme dhe do të jetë fushata e tij.

Edi Rama po e rishpik veten me këtë ide, pra integrimi në BE, turizimi, po gjen një mesazh pozitiv, energjik dhe po merr edhe flamurin e luftës kundër korrupsionit. Ne mund të themi se kjo është propagandë, por kjo po ndodh dhe shumë njërëz do ta besojnë dhe do të frymëzohen.  Po merr profesionistë nga bota, në vend që të vinin te opozita. Ka projekt serioz dhe është dhjetë hapa para të tjerëve.

Ajo që bëri opozita sot është sjellje e gabuar. Është banalitet total, opozita duhet të jetë e zgjuar. Pas kaq vitesh qeverisje e tillë, që flamurin e korrupsionit mos ta ketë opozita por ta ketë qeveria, është katastrofike.

Opozita duhet të përdorë trurin, sepse mendon se akoma është me muskuj. Opozita duhet të kuptojë aktorët, kundërshtarin e vet, të huajt, aktorët e tjerë, forcat që veprojnë dhe të ketë një strategji. Opozita do ta hajë njëlloj si me reformën ne drejtësi

Edhe një gjë, nuk mund të rrëzosh Ramën, pa prekur elitën që e mban në pushtet, oligarkët dhe mediat që e mbajnë në pushtet”, tha Sejamini.

Pas fjalës së kreut të grupit parlamentar të Partisë Demokratike, Gazment Bardhi në Kuvend, atij nuk i është përgjigjur kryeministri Rama, por ministrja Elisa Spiropali.

Spiropali e ka pyetur se kush është Bardhi, ai i që lufton me fjalë korrupsionin apo ai që shkon poshtë ballkonit për të mbrojtur shtatoren e korrupsionit të liderit të tij.

Spiropali: “Pyes veten kush je Gazi? Je ai që lufton me fjalë korrupsionin apo ai që shkon poshtë ballkonit për të mbrojtur shtatoren e korrupsionit të liderit tënd. Kush je koleg? Je ai që kërkojë hetim për babin e Zenit, apo je djali i sapoadoptuar i babait të Zenit? Të ndryshosh mendjen nuk është mëkat, por është të kesh 2 mendje është hall i madh. Hallin nuk ta qaj dot, ja edhe njëherë, ne dhe ju.

Dy kampe që edhe për datat në kalendar nuk biem dot dakord. Paskemi ndryshuar, nga kundër, votën do e jepni abstenim. Jeni në të drejtën tuaj, por unë shumë modestisht po iu ftoj për të kundërtën. Pavarësisht sesi do të votoni rezuluta nuk është ndryshim kursi i vendit, por thellim i reformimit për të bërë Shqipërinë shumë herë më të mirë sesa sot. Në të gjitha debatet që mund të bëhen ka të bëjë me luftën kundër korrupsionit. Ndarja e propozuar mirë apo keq është se pushteti është pjesë e sistemit, por të ndershmit e luftojnë korrupsionin”.

Bardhi: Zotrote na the edhe që Arben Noka është deputet dhe përfaqësues i qytetarëve, por në fakt ishte drejtues i një grupi të strukturual kriminal. E vetmja gjë pozitive që mund të veçoj është pranimi prej tij se na u dashka një përpjekje e veçantë kundër korrupsionit të qeverisë. Lufta ndaj korrupsionit duhet të trajtohet patjetër nga Kuvendi. Një nismë e tillë do të ishte e besueshme, dhe serioze vetëm nëse ata që e propozojnë janë të gatshëm për të luftuar korrupsionin. Edi Rama është artitekti i kriminalizimit të institucioneve, Të luftosh korrupsionin nuk ka nevojë për rezoluta por për akte dhe veprime. Rama e konsideron luftën kundër korrupsionit si çështje propagande.