“Kosova dhe Shqipëria, së bashku në kohë të vështira dhe në kohë të mira”, tha dje presidentja e Kosovës Vjosa Osmani, duke i pritur presidentin shqiptar Bajram Begaj në tapetin e kuq në Prishtinë. Kurse nga ana tjetër, Kryeministri Rama, i cili të hënën ishte në Prishtinë, nuk është pritur e as takuar nga homologu Albin Kurti por vetem me presidenten Osmani.

Nëse anulimi i seancës së përbashkët të dy qeverive nga Rama gati një vit më parë, më 14 qershor 2023, u interpretua si “alarm”, shmangia reciproke e dy kryeministrave 12 muaj më vonë, tregon se marrëdhëniet e tyre nuk janë zbutur aspak.

Qëndrimin në Prishtinë Rama e shfrytëzoi për të deklaruar se politika e jashtme e Kosovës është bërë e brendshme dhe se ne kete menyre, sjell vota por dëmton Kosovën ne arenen nderkombetare, dhe se pasioni duhet mbajtur larg nga politika kurse interesi kombëtar duhet të ndahet nga partia.

Sipas profesorit të së drejtës kushtetuese në Universitetin e Prishtinës, Mazllum Baraliu, kjo nuk do të thotë se ka konflikt mes Ramës dhe Kurtit.

“Është çështje e pikëpamjeve personale dhe ideologjive partiake për çështje të caktuara. Realisht nuk ka asnjë dallim radikal mes tyre, as mosmarrëveshje të natyrës serioze apo armiqësi” – deklaroi Baraliu

E megjithatë, ai shtoi se edhe pse nuk dihen detaje, nga ajo që shihet publikisht apo në prapaskena, duket se marrëdhëniet personale nuk janë më të mirat, por theksoi se ato që kanë rëndësi janë raportet mes institucioneve.

“Marrëdhëniet shtetërore janë në një nivel të mirë, marrëdhëniet mes qytetarëve janë në një nivel shumë të mirë, siç i ka hije shekullit të 21-të dhe demokracisë.

Megjithatë, është e qartë se është koha për liderët ballkanikë, të cilët mendojne se përfaqësojnë shtete të mëdha dhe fuqi të mëdha, dhe se nuk janë lider te vendeve te vogla ballkanike, duhet të kuptojnë se kanë marrë besimin e qytetarëve për të përmirësuar marrëdhëniet, jetën e qytetarëve, marrëdhëniet ekonomike, dhe të mos udhëhiqem nga kryeneçësia ballkanike, sepse kjo nuk të çon askund” – theksoi profesori i te drejtes drejtës kushtetuese në Universitetin e Prishtinës.

Dialogu me Serbinë është nyja kyçe e zgjidhjes së konfliktit midis Kosovës dhe shtetit serb.

Kështu thotë profesori dhe analisti politik Enver Bytyçi, i cili shprehet se, Kuvendi i ‘Botës serbe’, i tetë qershorit, e ka vështirësuar këtë dialog dhe sipas tij, Kosova gjendet në avantazh në kuptimin e situatës në terren.

Bytyci tha se strategjia e qeverisë Kurti për të bashkëpunuar me serbët në Kosovë e jo me Beogradin për zgjidhjen e problematikave, të cilat janë objekt i dialogut, duket se ka nis të funksionojë, por Prishtina zyrtare duhet të jetë euforike.

Profesori pohon se, Qeveria, presidentja dhe institucionet duhet të shtojnë përpjekjet për pajtim substancial të shqiptarëve me serbët që jetojnë në Kosovë.

“Ndoshta duhet një diskutim gjithëpërfshirës me ta. Me qëllim që të diferencohen temat që duhen diskutuar me Beogradin” – theksoi Bytyçi

“Në fakt presidenti i Serbisë po bën gjithëçka që ta kalojë përgjegjësinë te qeveria e Kurtit për mungesën e dialogut. Ai para pak ditesh tha per nje media zvicerane se Kosova dhe Serbia ishin afer një kompromisi, por pala e Prishtines nuk pranoi. Ishte fjala për krijimin e asociacionit” – deklaroi profesori I cili gjithashtu pohoi se kjo lë të kuptohet se për presidentin e Serbisë është kompromis i mirëpritur vetëm kur pala e Kosovës bënë lëshime dhe i ofron Beogradit atë që kërkon shefi I shtetit serb.

“Mesa shoh koncepti serb i kompromisit lidhet thjesht me lëshimet që bën ose duhet të bëjë Kosova. Vetëm atëherë, sipas Vuçic, ka kuptim dialogu. Por ai vetë ama nuk pranon asgjë, as të firmosë një marrëveshje. Kjo nuk ka kuptim. Kjo është zgjidhje që e sjell Kosovën në gjendjen e kohës së Milloshevicit. Serbia nuk e njeh realitetin e ri të krijuar pas shpalljes së pavarësisë së Kosovës” – potencoi Enver Bytyci

Rivaliteti mes kryeministrit të Kosovës Albin Kurti dhe homologut nga Shqipëria Edi Rama, sipas njohësit të marrëdhënieve ndërkombëtare Dritan Hoti , bazohet në atë se kush do të jetë protagonisti kryesor i çështjes shqiptare brenda “botës shqiptare” dhe beson se mes tyre nuk ka dallime ideologjike që do të ishin të dëmshme për interesat e shqiptarëve në Ballkan.

“Rama kërkon harmonizim thuajse të plotë të qëndrimeve të faktorit shqiptar me qëndrimet e komunitetit ndërkombëtar, ndërsa Kurti si kryeministër i shtetit të ri, qëndrimet e tij i mbështet në ato që i quan shqetësime akute ekzistenciale, përkatësisht identitetin e brendshëm politik dhe shqetësimet gjeopolitike, që sipas tij, duhet të mbizotërojnë ndaj fleksibilitetit që duhet të ketë Prishtina ndaj skemave të fuqive të mëdha për rajonin tonë” – keshtu u shpreh Hoti.

Rivaliteti mes Ramës dhe Kurtit, beson ai, ndonjëherë krijon një shije të keqe dhe përshtypjen se nuk ka qëndrim të përbashkët për çështje me rëndësi kapitale për shqiptarët.

“Kjo na kujton mosmarrëveshjet e dikurshme historike mes eksponentëve të ndryshëm të elitës politike shqiptare, te cilet megjithatë, kaluan lehtë nga konflikti në konsensus përmes asambleve kombëtare” – theksoi njohësi i marrëdhënieve ndërkombëtare

Ai gjithashtu vlerësoi se pikëpamjet shpeshherë dogmatike të Albin Kurtit krijojnë nervozizëm dhe shije të keqe te amerikanët, gjë që e zvogëlon avantazhin e Kosovës në marrëdhëniet rajonale.

“SHBA-ja ka një politikë afatgjatë dhe dëshiron ta tërheqë gradualisht Serbinë në kampin euroatlantik dhe po tregon durim në këtë proces. Unë shoh që Kurti nuk po jep mesazhin e duhur për çështje shumë të rëndësishme dhe mendoj se Rama te vetmin gabim qe beri ishte me provokimin me Ballkanin e Hapur,

kur me arrogancë kërkoi që Kosova të ishte pjesë e asaj nisme, të cilën ai e quajti të rëndësishme për paqen në Ballkanin Perëndimor.

Paqja në rajon do të varet nga disa faktorë të tjerë, si p.sh zhvillimi i luftës Rusi-Ukrainë, e cila ka një ndikim të drejtpërdrejtë në Evropën Juglindore për shkak të elementeve etnike dhe fetare. Paqja varet nga ndryshimi që duhet të ndodhë në vendet tona. Elitat serbe duhet të kalojnë një proces de-ideologjizimi kurse shqiptarët duhet të kalojnë në një proces pragmatizmi dhe fleksibiliteti, sepse duhet të jemi të vetëdijshëm se nuk mund të kemi kërkesa dhe arritje maksimaliste në çështjen tonë kombëtare” –  theksoi Hoti.

“Mes Albin Kurtit dhe Edi Ramës ka konflikte shumë të thella, të natyrës personale dhe politike. Në thelb është një luftë për supremaci, pra kush do të jetë lideri shqiptar, sepse në korpusin shqiptar këto dy role nuk janë të përcaktuara dhe Rama e Kurti e shohin veten si liderët kryesorë mbarëshqiptarë. Derisa të kristalizohen marrëdhëniet hierarkike mes tyre, ndoshta nuk mund të presim që të ketë takime të ndërsjella” – keshtu tha  politologu Ognjen Gogiç.
Duke komentuar faktin se kryeministri i Shqipërisë ka vizituar Prishtinën të hënën, por nuk është takuar me kryeministrin Kurti, dhe nuk ishte as në ngjarjen që shënoi përvjetorin e Lidhjes së Prizrenit po atë ditë, sipas Gogiç kjo tregon ndër të tjera se nuk ka dashur të marrë pjesë në “triumfin e Kurtit”, sepse ishte ai qe do dilte “në skenë” teksa në atë tubim, ai dërgoi mesazhe mbarëshqiptare.

“Nëse Rama do ishte atje, do kishte një rol dytësor. Ai e gjykoi se ishte e pamatur politikisht që të merrte pjesë. U takua vetëm me Vjosa Osmanin në Prishtinë, gjë që tregoi se ai bën dallimin në lidershipin e Kosovës dhe se e njeh dallimin që ekziston mes tyre. Rama gjithashtu është takuar edhe me kryebashkiakun e Prishtinës dhe më pas dërgoi mesazhe kritike për qeverinë në Prishtinë. E gjithë kjo kur shikohet së bashku, tregon shkallën e konfliktit mes tij dhe Kurtit dhe që të dy përdorin çdo mundësi për ta nënvizuar këtë hendek mes te dyve” – vlerësoi Gogiç, duke theksuar se dy kryeministrat shqiptarë i ndajnë shumë gjëra, e njëra prej tyre është se Rama do donte të kishte një rol të caktuar në dialogun ndërmjet Beogradit dhe Prishtinës, siç kishte në kohën kur Hashim Thaçi drejtonte negociatat nga anën e Kosovës.

“Por Kurti nuk e dëshiron këtë. Ai nuk do që Rama të faktorizohet, por se është vetëm Prishtina që i përcakton kushtet e dialogut me Beogradin pa rolin e madh që mund te merrte kryeministri I Shqiperise. Kësaj Rama iu përgjigj në mënyrën e tij, duke tentuar ta margjinalizojë Kurtin duke bërë vetë një draft të statutit të asociacionit, duke folur për çështjen, por edhe për marrëveshjet si ajo franko-gjermane dhe në përgjithësi kritikoi politikën dhe qasjen e Kurtit në dialog. Dhe tani në Prishtinë ai kritikoi qeverinë e Kosovës teksa tha se ajo bën politikë të jashtme krahas funksionit të politikës së brendshme” – deklaroi Gogiç.

Kurti, shtoi ai, nuk është pa përgjegjësi për marrëdhënien siç ekziston, sepse dikur ai drejtoi fushata kundër Ramës në zgjedhjet parlamentare në Shqipëri, në të cilat kishte kandidatët e tij dhe mes tyre kishte edhe mosmarrëveshje përsa i përket Nismës së Ballkanit të Hapur, një nga propozuesit kryesorë të së cilës ishte Rama, ndërsa Kurti ishte kundërshtar i nismës dhe e perceptoi atë si një tradhti qe vinte nga Shqipëria.