Zgjerimi i BE-së, Varhelyi: Nëse Këshilli dëshiron ta realizojë, ky është një lajm i mirëpritur

Komisioneri Evropian për Fqinjësinë dhe Zgjerimin, Oliver Varhelyi, këtë të enjte ka reaguar ndaj propozimit të Presidentit të Këshillit Evropian, Charles Michel, se BE dhe vendet kandidate duhet të jenë gati për zgjerim deri në vitin 2030. Varhelyi në një deklaratë për mediat ka thënë se ky është një lajm i mirëpritur dhe ka theksuar se është gjithmonë i gatshëm të bëjë çdo lloj propozimi që do të ndihmonte në zgjerimin e BE-së. “Ajo që unë mendoj është se nëse ky është një mesazh nga Këshilli që Këshilli dëshiron të angazhohet më në fund dhe të bëjë një hap të madh për të realizuar zgjerimin, ky është një lajm i mirëpritur. Nuk mendoj se bëhet fjalë për data. Unë mendoj se është më shumë një çështje vullneti, dhe gjithashtu çështje e dorëzimit; dorëzim në anën e BE-së, por edhe dorëzim nga ana e vendeve tona partnere në Ballkanin Perëndimor apo tre vendeve të tjera kandidate”, tha Komisioneri. Gjithashtu Varhelyi kujtoi se Komisioni është i gatshëm të bëjë çdo propozim për të arritur atje, gjë që do të shihet tashmë në tetor kur do të dëshirojë të vendosë propozime thelbësore duke përfshirë Planin e Rritjes, të cilin presidentja Ursula von der Leyen e ka shpjeguar tashmë në Bratislavë . Ai është përgjigjur edhe në lidhje me propozimin për zgjerim në 2030, ku ka theksuar se Këshilli duhet të vazhdojë përpara me të gjitha propozimet që po bëjmë dhe të marrë çdo vendim që mund të marrim sado i vogël apo  i madh.

…….Kryeministri Edi Rama ka reaguar për një deklaratë të komisionerit Olivér Várhelyi lidhur me zgjerimin e BE-së. Komisioneri evropian iu përgjigj pozitivisht deklaratave të Presidentit të Këshillit Evropian, Charles Michel gjatë forumit të Bled-it, duke e cilësuar këtë si një lajm të mirëpritur. Ai theksoi se Komisioni Evropian është gjithmonë i gatshëm të bëjë çdo lloj propozimi që do të ndihmonte në zgjerimin e BE-së. Kryeministri Rama shprehet përmes një postimi në platformën ‘X’ se komisioneri Várhelyi nuk e ka zhgënjyer kurrë rajonin e Ballkanit Perëndimor. “KOMISIONERI YNË që nuk e zhgënjeu kurrë rajonin tonë, veçanërisht në kohë të vështira. Duhet pranuar se pas fjalimit të papritur të Presidentit Michel në Forumin Strategjik të Bled, autobusi i ngadaltë i BE-së po bëhet një vend interesant për të qëndruar edhe pa një vend të lirë – pa dyshim që pasagjerët e Ballkanit Perëdimor mund të durojnë më mirë kohëzgjatjen e gjatë të udhëtimit ndërsa ndjekin një bisedë me zë të lartë mes djemve të ulur. Le të dëgjojmë se çfarë ka më pas.”, shkruan Rama.