BBVK 5 më herët se zakonisht? Përfundon përzgjedhja e banorëve

Përgatitjet për edicionin e pestë të “Big Brother VIP Kosova” duket se kanë hyrë në fazën përfundimtare, ndërsa po qarkullojnë detaje të reja për nisjen e spektaklit dhe drejtimin e tij.

Sipas burimeve të “Indeksonline”, BBVK 5 pritet të nisë më herët se edicionet e mëparshme, me spektaklin që raportohet se do të hapë dyert gjatë javës së parë të tetorit.

Ndërkohë, procesi i përzgjedhjes së banorëve raportohet të ketë përfunduar. Megjithatë, emrat e personazheve që do të hyjnë në shtëpinë e famshme nuk janë bërë ende publikë zyrtarisht.

Një ndryshim i rëndësishëm pritet edhe në moderim. Sipas raportimeve, Alaudin Hamiti do të drejtojë i vetëm edicionin e pestë, pas largimit të Jonida Vokshit.

Për Hamitin, ky pritet të jetë viti i pestë radhazi në drejtimin e “Big Brother VIP Kosova”. Ndërsa Jonida Vokshi, e cila ka moderuar spektaklin së bashku me të në katër edicionet e para, ka konfirmuar se nuk do të jetë pjesë e sezonit të ri. Ajo ka bërë të ditur se do të marrë një pauzë nga televizioni, duke iu kushtuar projekteve në film dhe teatër.