Vuçiç i paparashikueshëm/ Peter Feith ka një thirrje për Kosovën

Diplomati holandez, Pieter Feith, edhe pse ka përfunduar misionin për Kosovën, vazhdon edhe sot e kësaj dite t’i përcjell me vëmendje zhvillimet politike në vend.

Ai, i ka sugjeruar qeverisë Kurti që në këtë periudhë të mos bëjë gabime të panevojshme, duke pasur parasysh zhvillimet gjeopolitike. Megjithatë, Feith thotë se i kupton vështirësitë me të cilat po ballafaqohet shteti më i ri në Evropë.

“Do të sugjeroja që Kosova të vazhdojë me këtë moment, dhe të arrijë rezultate. E dimë që s’do të jetë lehtë ashtu siç nuk ishte deri tani, sepse Serbia udhëhiqet nga një sundues autoritar, i cili është i paparashikueshëm. E dini që tani jemi në mes të një krize gjeopolitike, dhe situata e sigurisë është shumë, shumë e vështirë për momentin. E dimë pozicionin e Serbisë ndaj luftës në Ukrainë dhe miqësine e tij me Putin, e cila nuk është e mirë  pranuar në Bruksel. Është mese e qartë se Aleksander Vuçic nuk është duke bërë hapa drejt njohjes së pavarësisë së Kosovës. Megjithatë në këtë fazë Kosova nuk duhet të bëjë gabime të panevojshme. Mendoj që qasja e Kurtit në dialog ka qenë më nacionaliste krahasuar me liderët e kaluar, por duhet thënë se është treguar edhe konstruktiv” –  ka deklaruar Feith

Diplomati holandez, ka folur edhe për zgjedhjet evropiane që do të mbahen këtë vit dhe sipas tij partitë e djathta në Evropë mund të paraqesin rrezik për Kosovën, mirëpo siç u shpreh ai, nuk ka arsye për panik.

Ai konsideroi se ndërmjetësuesi Mirislav Lajçak ka bërë një punë të mirë në dialog, dhe se duhet t’i vazhdohet mandati.

“Do të ketë rreziqe në të ardhmen, jo vetëm nga zgjedhjet evropiane që do të sjellin më shumë parti të djathta, por edhe me rezultatet e zgjedhjeve në SHBA, që mund t’i sjellin Trump mandatin e dytë.

Pritshmëritë nuk janë shumë pozitive, por nuk ka arsye për panik, nuk ka arsye të mendohet që BE-ja do të ndryshojë pozitën ndaj Kosovës. Vlerësoj se Lajçak ka shfaqur energji të madhe në shtyrje para të procesit dhe ruajtjen e momentit. Nëse nuk ka mjaft progres deri tani, nuk mendoj që mund të fajësojmë Lajçak-un për këtë”, ka theksuar Feith, duke shtuar edhe ka zhgenjim në Bruskel me menyrën si po sillet presidenti i Serbisë, Aleksander Vuçiç.

Doke folur gjithashtu për sulmin terrorist në Banjskë të Zveçanit, diplomati holandez u shpreh:

“Mendoj që në bazë të dëshmive dhe fakteve, ka supozim të qartë që ky sulm s’do të ndodhte pa përkrahjen e institucioneve të qeverisë serbe. Ka një pakënaqësi të madhe rreth politikave të Vuçic ndaj Kosovës. Perpos afrimit të lidhjeve të Serbisë me Rusinë, është edhe ky moment brengosës. Persa i përket Brukselit, nuk është e qartë, nëse Vuçiçi preferon të jetë anëtar i BE-së, ose nëse preferon të jetë në një linjë me Rusinë, kjo nuk është akoma e qartë. Por ajo që mund të thuhet është se nuk ka përkushtim të fuqishëm nga ana e Beogradit, për të shënuar progres drejt anëtarësimit në BE”.