Sekuestrohen ma’rijuanë në kufi me Malin e Zi, trafikantët arratisen në Shqipëri

Policia Kufitare e Malit të Zi ka sekuestruar 66 kilogramë lëndë narkotike në zonën e fshatit Sukobin të Ulqinit. Lidhur me këtë operacion mësohet se 2 persona të paidentifikuar kanë arritur të largohen drejt Shqipërisë. Ata dyshohet se ishin duke transportuar lëndën narkotike, por sapo kanë parë ekipet policore, kanë lënë çantat, për t’u rikthyer drejt territorit shqiptar.

Gjatë kontrollit në zonë, ekipet policore kanë gjetur tre çanta me 119 pako marijuanë me peshë rreth 66 kilogramë, njoftoi Drejtoria e Policisë së Malit të Zi. Ndërkohë Policia shqiptare është në kërkim të dy personave të arratisur dhe për gjithçka është njoftuar Prokuroria e Lartë e Shtetit në Podgoricë.

“Policia shqiptare është në kërkim të personave, ndërsa për ngjarjen është njoftuar edhe Prokuroria e Lartë e Shtetit në Podgoricë”, thuhet në njoftimin e Policisë së Malit të Zi.