Pako me drogë të fshehura brenda një jastëku, arrestohet 35-vjeçari në Morinë

Një 35-vjeçar ka rënë në prangat e policisë, pasi tentoi të trafikonte drejt Shqipërisë 2 pako me lëndë të dyshuar narkotike kanabis përmes pikës kufitare të Morinës.

Sipas asaj që bëjnë të ditur uniformat blu 2 pakot me peshë totale 2 kilogramë e 227 gramë u gjetën të fshehura brenda një jastëku, në mjet.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjthshëm Kukës, për veprime të mëtejshme.

Tentoi të trafikonte në Shqipëri, 2 pako me lëndë të dyshuar narkotike kanabis, arrestohet në flagrancë 35-vjeçari. Sekuestrohen 2 pakot me peshë totale 2 kilogramë e 227 gramë dhe automjeti që drejtonte 35-vjeçari. Shërbimet e Policisë Kufitare në Morinë, në vijim të kontrolleve për goditjen e krimeve kufitare, bazuar në analizën e riskut dhe në kontrollet me përzgjedhje, kanë goditur në bashkëpunim me shërbimet e DVP Kukës, një rast të tentativës për trafikim të lëndëve narkotike.

Për këtë rast, specialistët për Hetimin e Trafiqeve të Paligjshme dhe Narkotikëve të DVP Kukës arrestuan në flagrancë shtetasin P. G., 35 vjeç, banues në Fier. Në hyrje të RSH-së, shërbimet e Policisë Kufitare kanë kaluar në vijën e dytë, për kontroll më të detajuar, automjetin tip “Audi”, me drejtues shtetasin P. G. Gjatë kontrollit në automjet, shërbimet e Policisë gjetën të fshehura 2 pako me lëndë të dyshuar narkotike kanabis, me peshë totale 2 kilogramë e 227 gramë.  Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjthshem Kukës, për veprime të mëtejshme”, njofton Policia.