“Ta sjellim Putinin në tryezën e negociatave”/ Zelensky dhe krerët e Evropës ushtrojnë presion mbi Moskën

Nevoja për të vazhduar presionin për ta detyruar Presidentin rus Vladimir Putin të ulet në tryezën e negociatave për bisedime paqeje, u nënvizua nga udhëheqësit evropianë dhe Presidenti ukrainas Volodymyr Zelensky, gjatë shkëmbimit të pikëpamjeve të tyre në Këshillin Evropian në Bruksel këtë mëngjes.

Sipas një zyrtari të BE-së, Zelensky i informoi udhëheqësit mbi valën e fundit të sulmeve ruse ndaj objektivave politike dhe infrastrukturës energjetike në Ukrainë, situatën ekonomike të vendit, nevojat urgjente të Forcave të Armatosura të Ukrainës dhe gjendjen aktuale të përpjekjeve të fundit ndërkombëtare për të arritur një armëpushim.

Udhëheqësit e BE-së dhe Zelensky ranë dakord se nuk ka gatishmëri nga ana e Rusisë për t’u angazhuar në bisedime kuptimplote për të arritur paqen dhe për t’i dhënë fund luftës.

Prandaj, ata ranë dakord se është e nevojshme të vazhdohet presioni për ta detyruar Putinin të ulet në tryezën e negociatave.

Sipas të njëjtit zyrtar të BE-së, Zelensky falënderoi udhëheqësit evropianë për miratimin e fundit të paketës së 19-të të sanksioneve dhe për sigurimin që BE-ja do të vazhdojë të qëndrojë pranë Ukrainës në planin afatgjatë.

Pas shkëmbimit të pikëpamjeve me presidentin ukrainas, udhëheqësit evropianë vazhduan diskutimin e tyre mbi Ukrainën, në veçanti mbi mënyrën më të mirë për të mbuluar nevojat e financimit të vendit për dy vitet e ardhshme (2026-2027).

Udhëheqësit evropianë do të kthehen në diskutimet mbi Ukrainën më vonë, këtë pasdite.