LUFTA/ TRUMP NXJERR INATIN ME SPANJEN

Presidenti i Shteteve të Bashkuara, Donald Trump, ka rritur presionin ndaj vendeve evropiane për të dërguar forca ushtarake në Ngushticën e Hormuzit, duke vendosur një afat të shkurtër për përgjigje.

Sipas informacioneve të Der Spiegel, Sekretari i Përgjithshëm i NATO-s, Mark Rutte, ka njoftuar kryeqytetet evropiane se Trump pret angazhime konkrete brenda pak ditësh për dërgimin e anijeve luftarake ose kapaciteteve të tjera ushtarake.

Sipas diplomatëve evropianë, kërkesa e Trump përbën një ultimatum, pasi deklaratat politike të deritanishme nuk konsiderohen më të mjaftueshme.

Ndërkohë, Gjermania ka sinjalizuar gatishmëri për pjesëmarrje në një mision të përbashkët, por ka vendosur kushte të qarta, përfshirë një mandat të fortë nga OKB-ja dhe një armëpushim të qëndrueshëm ose marrëveshje të negociuar.

Përtej Hormuzit, Trump po ushtron presion të mëtejshëm ndaj aleatëve të NATO-s. Sipas raportimeve, administrata amerikane po përgatit një listë të vendeve evropiane bazuar në qëndrimin e tyre ndaj luftës me Iranin.

Burimet tregojnë se vendet që nuk kanë mbështetur SHBA-të mund të përballen me tërheqje të trupave amerikane.

Spanjë pritet të jetë në qendër të kësaj liste, pasi ka refuzuar të lejojë fluturimet e avionëve luftarakë amerikanë mbi territorin e saj.

Nga ana tjetër, Gjermania nuk ka vendosur kufizime për përdorimin e bazave amerikane, por është cilësuar nga Washingtoni si kundërshtuese e luftës, pjesërisht për shkak të deklaratave të zyrtarëve të saj.

Sipas raportimeve, një deklaratë e ministrit të Mbrojtjes Boris Pistorius, i cili e përshkroi konfliktin si “jo lufta jonë”, është atribuuar nga Shtëpia e Bardhë kancelarit Friedrich Merz, pavarësisht tonit më diplomatik të këtij të fundit.