Në prag të bisedimeve me Iranin, Trump: Hormuzi do të rihapet së shpejti, me ose pa bashkëpunimin e Teheranit

Presidenti i SHBA-së, Donald Trump, ka deklaruar se Ngushtica e Hormuzit do të rihapet “shumë shpejt”, me ose pa bashkëpunimin e Iranit. Duke iu drejtuar gazetarëve në Uashington në prag të bisedimeve midis zyrtarëve amerikanë dhe iranianë në Pakistan, Trump deklaroi se Shtetet e Bashkuara “do ta rihapin Gjirin” dhe se vendet e tjera janë “të gatshme të ndihmojnë”.
Ngushtica e Hormuzit është një pikë e rëndësishme tranziti për naftën globale dhe çdo ndërprerje e trafikut detar ka efekte të menjëhershme në çmimet e energjisë dhe stabilitetin e furnizimeve globale.
Ndërkohë Delegacioni iranian mbërriti në Bazën Ajrore Nur Khan në Islamabad përpara negociatave të planifikuara për sot me Shtetet e Bashkuara. Përfaqësuesit e Teheranit u pritën nga Shefi i Shtabit të Ushtrisë Pakistaneze Asim Munir dhe zyrtarë të tjerë të lartë qeveritarë.
Delegacioni iranian ka gjithsej 71 anëtarë, sipas agjencisë iraniane të lajmeve Tasnim . Grupi përfshin negociatorë të lartë, këshilltarë teknikë, përfaqësues të medias, si dhe personel diplomatik dhe të sigurisë.
Ekipi negociator udhëhiqet nga Kryetari i Parlamentit Mohammad Bagher Ghalibaf dhe përfshin Ministrin e Jashtëm Abbas Araghchi, Guvernatorin e Bankës Qendrore Abdolnaser Hemmati, Sekretarin e Këshillit Suprem të Mbrojtjes Kombëtare Ali Akbar Ahmadian, Zëvendës Ministrin e Jashtëm Kazem Gharibabadi dhe zëdhënësin e Ministrisë së Jashtme Esmaeil Baghaei.
Bisedimet e planifikuara për sot, të ndërmjetësuara nga Pakistani, vijnë në mes të tensioneve të larta rajonale dhe synojnë të konsolidojnë një armëpushim të brishtë pas javësh konflikti dhe paqëndrueshmërie që kanë ndikuar edhe në tregjet globale të energjisë