Zyrtari iranian: Uraniumi mund të arrijë 90% pasurim nëse SHBA sulmon sërish

Irani mund të pasurojë uraniumin deri në nivelin 90 për qind, i konsideruar gradë e përshtatshme për armë bërthamore, nëse Shtetet e Bashkuara rifillojnë sulmet ndaj vendit, ka paralajmëruar një zyrtar i lartë iranian.
Deklarata u bë nga Ebrahim Rezaei, zëdhënës i Komitetit parlamentar për Politikën e Jashtme dhe Sigurinë Kombëtare, përmes një postimi në platformën X.
Sipas Rezaeit, parlamenti iranian po shqyrton mundësinë e një ndryshimi të politikës së pasurimit të uraniumit në rast të një përshkallëzimi të ri ushtarak nga Washingtoni.
Paralajmërimi vjen në një moment tensionesh të shtuara mes Teheranit dhe Washington-it, ndërsa raportime të fundit sugjerojnë se administrata e presidentit amerikan, Donald Trump, po shqyrton rikthimin e operacioneve ushtarake ndaj Iranit.
Rezaei, i njohur për deklaratat e tij të ashpra ndaj politikës amerikane, kishte sulmuar më herët administratën amerikane edhe me komente fyese në rrjetet sociale.
Në maj, përpara konfliktit Izrael-Iran të vitit 2025, zyrtarë amerikanë kishin deklaruar për The Wall Street Journal se Irani mund ta transformonte stokun ekzistues të uraniumit në material të pasuruar në nivel 90 për qind, të përshtatshëm për armë bërthamore, në më pak se dy javë.