Reforma e territorit/ Tritan Shehu i shqetesuar: Edi Rama kerkon sulltanatin e tij

Debati për uljen e numrit të bashkive ka rikthyer përplasjen politike mes opozitës dhe qeverisë. Deputeti i Partisë Demokratike, Tritan Shehu, e ka kundërshtuar këtë ide, duke e cilësuar si një hap drejt centralizimit të mëtejshëm të pushtetit.

Sipas Shehut, ndryshimet territoriale po diskutohen pa konsultimin e komuniteteve dhe rrezikojnë të dëmtojnë identitetin, historinë dhe autonominë e njësive vendore.

Ai argumenton se bashkitë nuk janë vetëm struktura administrative, por përfaqësojnë komunitete me tradita dhe veçori të tyre, ndërsa vendimmarrja duhet të jetë sa më pranë qytetarëve.

Deputeti demokrat kritikoi edhe reformën territoriale të vitit 2015, duke pretenduar se reduktimi i numrit të njësive vendore ka larguar qytetarët nga shërbimet dhe ka dobësuar rolin e pushtetit lokal.

Sipas tij, një ulje e re e numrit të bashkive do të rrisë kontrollin e pushtetit qendror mbi nivelin vendor.

Ndërkohë, debati për reformën territoriale pritet të jetë një nga temat më të nxehta politike, pasi prek drejtpërdrejt mënyrën e organizimit të pushtetit lokal në Shqipëri.

“Edhe Sulltanët nuk e kanë bërë këtë punë. Edhe Sulltanët e ruanin autonominë vendore” – ka shkruar Tritan Shehu