Goditen grupet shqiptare që bastisnin vila dhe apartamente

Autoritetet spanjolle kanë goditur dy grupe kriminale të dyshuara për një seri grabitjesh në banesa në Madrid dhe Toledo, ndërsa gjashtë persona janë arrestuar dhe janë lënë në burgim të përkohshëm.

Njëri prej grupeve, me bazë në zonat San Sebastián de los Reyes dhe San Agustín del Guadalix, dyshohet se udhëtonte periodikisht drejt Spanjës për të kryer grabitje dhe më pas kthehej në Shqipëri me sendet e vjedhura. Në shënjestër ishin kryesisht banesa individuale në zona rezidenciale.

Sipas hetimeve, autorët hynin në banesa përmes dyerve ose dritareve, duke përdorur edhe metodën e njohur si “resbalón”. Operacionet kryheshin brenda pak minutash. Dy persona hynin në banesë për të marrë sendet me vlerë, ndërsa një tjetër qëndronte në automjet dhe monitoronte lëvizjet në zonë.
Në objektet e grabitura janë gjetur prova se autorët synonin kryesisht bizhuteri, ora, çanta dhe para të gatshme.

Hetuesit dyshojnë gjithashtu se i njëjti grup kishte zhvilluar edhe më parë fushata të ngjashme grabitjesh në Spanjë.
Aktiviteti i tij është lidhur me disa zona të Madridit, përfshirë Boadilla del Monte, Villanueva de la Cañada, Torrelodones, Las Rozas, Majadahonda, Griñón, Paracuellos del Jarama dhe Pozuelo de Alarcón, si dhe me Esquivias në Toledo.

Në një tjetër operacion, Guardia Civil ka shpërbërë një grup me bazë në Coslada, i përbërë nga tre persona dhe i dyshuar për grabitje në apartamente të pallateve shumëkatëshe. Sipas hetimeve, një prej anëtarëve kontrollonte paraprakisht banesat dhe vendoste shenja në dyer për të përcaktuar nëse ato ishin të banuara.

Pas përzgjedhjes së objektivave, grupi përdorte metoda të ndryshme për hapjen e bravave dhe hynte në apartamente për të marrë sendet me vlerë. Veprimtaria kryhej kryesisht në orët e mëngjesit dhe hetuesit dyshojnë se grupi mund të kryente deri në dy ose tre grabitje brenda një dite.

Dy persona hynin në ndërtesë, ndërsa i treti qëndronte jashtë për të kontrolluar situatën dhe lëvizjet në zonë. Hetimet kanë zbardhur grabitje në Tres Cantos, Rivas-Vaciamadrid, Arganda del Rey dhe Valdemoro.

Me këto dy operacione, numri i grupeve kriminale të specializuara në grabitjet e banesave dhe të shpërbëra nga Guardia Civil gjatë vitit 2026 ka arritur në shtatë. Në total, operacionet kanë çuar në arrestimin e 26 personave dhe në zbardhjen e rreth 120 veprave penale.

Autoritetet spanjolle vijojnë t’i konsiderojnë grupet kriminale itinerante si një nga objektivat kryesorë të hetimeve, veçanërisht në zonat rezidenciale ku grabitjet e banesave shfaqin rritje gjatë periudhave të caktuara.