“Qeveria të marrë vendime të vështira”/ Mesazhi i fortë i arqipeshkvit, Begaj thërret krerët e komuniteteve fetare

Arqipeshkvi i Shkodër-Pultit, Imzot Giovanni Peragine, ka bërë thirrje për përgjegjësi institucionale dhe dialog në një moment kur Shqipëria po përballet me protesta dhe tensione të vazhdueshme.

Në mesazhin e tij publik, të dhënë në vigjilje të festës së Zojës së Shkodrës, ai ka theksuar se autoritetet kanë detyrimin të dëgjojnë qytetarët dhe të ndërmarrin vendime konkrete për kapërcimin e krizës.

“Kur besimi te institucionet tronditet dhe paqja shoqërore vihet në rrezik, është detyrë e atyre që qeverisin të marrin përgjegjësitë që u takojnë”, është shprehur arqipeshkvi.

Ai ka folur për nevojën që drejtuesit e institucioneve të marrin edhe vendime të vështira, nëse këtë e kërkon interesi i vendit.

Në të njëjtën kohë, Peragine ka dënuar pa rezerva përdorimin e dhunës, duke kërkuar që pakënaqësitë qytetare të trajtohen përmes dialogut dhe respektimit të së drejtës.

Deklarata e tij vjen ndërsa Presidenca po ndërmerr kontakte në kuadër të situatës së krijuar.

Sipas raportimeve mediatike, Presidenti Bajram Begaj ka thirrur për sot, 18 tetor, në orën 12:00, një takim me drejtuesit e komuniteteve fetare.

Takimi vjen pas mesazhit të Presidentit të datës 15 tetor, kur ai dënoi dhunën, kërkoi qetësi dhe shprehu gatishmërinë për të krijuar hapësira dialogu.

Ende nuk është bërë publik një rezultat apo një propozim konkret që mund të dalë nga takimi i planifikuar.

Përfshirja e drejtuesve fetarë në diskutimet për qetësimin e situatës sjell në vëmendje rolin që komunitetet fetare mund të luajnë në nxitjen e dialogut shoqëror, pa zëvendësuar përgjegjësinë politike të institucioneve.