BRUKSELI NGRE FRENAT/ FIKET BUTONI, RAMA MBETET PA ÇELESIN E BANKES

Banka e Shqipërisë pritet të ketë një kufizim të ri ligjor sa i takon financimit të qeverisë. Një projektligj i depozituar në Kuvend nga deputetja Milva Ekonomi parashikon ndalimin e financimit dhe kreditimit direkt të qeverisë nga banka qendrore.

Ndryshimi lidhet me përafrimin e legjislacionit shqiptar me kërkesat e Bashkimit Evropian dhe, sipas materialit, konsiderohet pjesë e kushteve për mbylljen e Kapitullit 17 të negociatave për integrimin evropian.

Një nga ndryshimet kryesore është heqja e mundësisë që qeveria të marrë kredi të përkohshme direkte nga Banka e Shqipërisë për nevoja buxhetore. Në këtë mënyrë, financimi i deficitit duhet të mbështetet te mekanizmat e tregut dhe te politika fiskale e qeverisë.

Projektligji parashikon gjithashtu kufizime për blerjen direkte të borxhit të ri të qeverisë në tregun primar. Banka e Shqipërisë nuk do të mund të blejë bono thesari apo obligacione në momentin kur ato emetohen nga Ministria e Financave.

Përjashtimi lidhet vetëm me titujt ekzistues që ndodhen në bilancin e bankës. Në rast maturimi, banka mund të blejë tituj me të njëjtën vlerë, me kushte të përcaktuara dhe me çmim tregu, në mënyrë që të ruajë strukturën e portofolit të saj.

Sipas të dhënave të cituara në material, Banka e Shqipërisë mban në bilancin e saj tituj të qeverisë shqiptare në një vlerë që historikisht ka lëvizur rreth 40 deri në 55 miliardë lekë.

Megjithatë, pesha e bankës qendrore në borxhin total publik është ulur ndjeshëm gjatë viteve të fundit dhe aktualisht vlerësohet rreth 3 deri në 4 për qind.

Në thelb, ndryshimi synon të vendosë një vijë më të qartë mes politikës monetare dhe financave publike, duke kufizuar mundësinë e financimit të drejtpërdrejtë të qeverisë nga banka qendrore.