“Dron me eksploziv për t’i vënë zjarrin Kryeministrisë!”/ Rama zbulon planin e studentëve

Kryeministri Edi Rama ka reaguar për protestën e dhunshme në bulevardin “Dëshmorët e Kombit”, duke dënuar sulmet ndaj policisë dhe dëmtimin e pronës publike e private. Në një komunikim në Facebook, kreu i qeverisë e cilësoi dhunën si të papranueshme dhe deklaroi se ajo nuk përfaqëson rininë shqiptare.

Rama u ndal te gurët e shkëputur nga bulevardi dhe të përdorur kundër forcave të rendit, duke paralajmëruar se mjete të tilla mund të shkaktojnë pasoja të rënda, deri në humbje jete. Ai iu referua edhe pamjeve të transmetuara nga televizionet, ku, sipas tij, shfaqen grupe që nxisin dhunën dhe që nuk kanë lidhje me studentët.

Gjatë deklaratës, kryeministri bëri një paralelizëm me ngjarjet e 21 Janarit, duke theksuar se situata e sotme duhet parë edhe në kontekstin e objektivave të Shqipërisë për integrimin evropian.

“ Këtu nuk po sfidohem unë, nuk po sfidohet qeveria, por po sfidohet një mision, një objektiv: Shqipëria në BE në vitin 2030”, u shpreh Rama.

Ai kritikoi gjithashtu sulmet ndaj bankave dhe bankomateve, duke argumentuar se këto akte bazohen në idenë e gabuar se në këto institucione mund të gjenden para për t’u marrë. Sipas tij, bankat e sotme funksionojnë ndryshe nga firmat piramidale të viteve ’90, ndërsa organizatorët e protestës synojnë të mbajnë qytetarët në rrugë.

Një tjetër pretendim i rëndësishëm i bërë nga Rama lidhet me zbulimin e një droni me eksploziv, i cili, sipas kryeministrit, dyshohet se do të përdorej për t’i vënë zjarrin oborrit të Kryeministrisë. Ai deklaroi se autoritetet disponojnë të dhëna për këtë çështje, por nuk dha detaje të mëtejshme në deklaratën e cituar.

Rama foli edhe për ndikimin e ideve ekstremiste te një pjesë e vogël e studentëve, duke e lidhur situatën në Shqipëri me zhvillime të ngjashme që, sipas tij, po shfaqen në vende të tjera evropiane dhe në Brazil.

Në përfundim, kryeministri deklaroi se askush nuk duhet të frikësohet për shkak të mendimeve që bien ndesh me qëndrimet e organizatorëve të protestës, duke theksuar se Shqipëria nuk mund të lulëzojë vetëm kur në pushtet janë ata që pretendojnë se e përfaqësojnë.