Flamuri i UÇK-së u ngrit nga studentët/ Reagojnë Veteranët: Ky simbol nuk lidhet me dhunën

Organizata e Veteranëve të Luftës së Ushtrisë Çlirimtare të Kosovës ka reaguar pas përdorimit të flamurit të UÇK-së nga disa protestues gjatë përplasjeve të 14 tetorit në Tiranë, duke dënuar lidhjen e këtij simboli me akte dhune dhe vandalizmi.

Gjatë protestës, e cila u shoqërua me përplasje mes demonstruesve dhe Policisë së Shtetit, disa persona u panë duke valëvitur flamurin e UÇK-së në zonat ku po sulmoheshin institucione dhe po digjeshin kosha mbeturinash. Në një prej pamjeve të publikuara, një protestues i maskuar shihet duke valëvitur flamurin mbi kosha që digjeshin, ndërsa persona të tjerë përreth dëgjohen duke thirrur “UÇK, UÇK!” dhe “Rroftë Shqipëria e madhe!”.

Në reagimin e saj, Organizata e Veteranëve të Luftës së UÇK-së thekson se flamuri përfaqëson Luftën Çlirimtare të Kosovës, dëshmorët dhe sakrificën për liri. Sipas organizatës, ky simbol nuk duhet të përdoret për të justifikuar apo për të mbuluar veprime që dëmtojnë pronën publike dhe private.

“Çdo qytetar ka të drejtën e protestës, por asnjë pakënaqësi, sado e thellë të jetë, nuk i jep të drejtë askujt ta lidhë flamurin e UÇK-së me dhunën, shkatërrimin dhe plaçkitjet”, thuhet në deklaratë. Organizata u ka bërë thirrje organizatorëve dhe pjesëmarrësve të protestave të ruajnë dinjitetin e simbolit dhe të mos e përfshijnë atë në akte vandalizmi.

Protesta e 14 tetorit në Tiranë zgjati më shumë se nëntë orë dhe u shoqërua me përplasje të përsëritura mes protestuesve dhe forcave të rendit. Gjatë saj u dëmtuan të paktën katër degë të bankave të nivelit të dytë, ndërsa mes objekteve të sulmuara ishte edhe Banka e Shqipërisë.

Reagimi i veteranëve të UÇK-së vë në fokus dallimin mes së drejtës për të protestuar dhe përdorimit të simboleve historike në veprime të dhunshme, të cilat organizata i dënon.