Një i vdekur nga tornado e rrallë në afërsi të Parisit

Një tornado përfshiu lagjet në veri të Parisit të hënën, duke rrëzuar tre vinça ndërtimi që vranë një person dhe lanë katër të tjerë me lëndime kritike, thanë autoritetet.

Qyteti i Ermont, rreth 20 km në verilindje të Parisit u godit më rëndë nga tornadoja e papritur që shkaktoi dëme në rreth 10 lagje.

Prokurori rajonal Guirec Le Bras tha se një punëtor ndërtimi 23-vjeçar u vra në një kantier ndërtimi dhe 10 persona u plagosën, katër prej të cilëve në gjendje kritike.

Ministri i Brendshëm Laurent Nunez tha në platformën X se kishte qenë një stuhi me “intensitet të papritur dhe të rrallë”.

Videot e shpërndara në mediat sociale treguan tre vinça që binin brenda pak sekondash nga njëri-tjetri.

Një vinç ra mbi një klinikë, pa shkaktuar lëndime, dhe një tjetër mbi një ndërtesë banimi.

Dhjetëra zjarrfikës, policë dhe personel mjekësor ishin në vendngjarje, thanë autoritetet.