Rama: Shqipëria nuk i druhet Iranit dhe mbështet linjën e ashpër të SHBA-ve

Kryeministri Edi Rama ka mbrojtur qëndrimin e Shqipërisë në mbështetje të politikës amerikane ndaj Iranit, duke theksuar se vendi nuk ka frikë nga kërcënimet dhe se vendimet e marra janë të bazuara në përvoja konkrete dhe interesa kombëtare.
Në një intervistë për median franceze, “Le Point”, Rama u shpreh se Shqipëria ka ndërprerë marrëdhëniet diplomatike me Iranin pas sulmit kibernetik të vitit 2022, duke e cilësuar regjimin në Teheran si një kërcënim real.
“Shqipëria është një nga vendet e rralla që nuk ka marrëdhënie me Iranin. Sulmi kibernetik ndaj nesh ishte një agresion i drejtpërdrejtë”, tha ai.
Kreu i qeverisë theksoi se vendi ka pranuar rreth 3 mijë anëtarë të opozitës iraniane për arsye humanitare, si dhe mbi 4 mijë shtetas afganë pas zhvillimeve të vitit 2021.
Sipas tij, kjo është në përputhje me traditën shqiptare të mikpritjes dhe mbrojtjes së të huajve.

Rama nënvizoi se Shqipëria, si anëtare e NATO, nuk është e ekspozuar ndaj rrezikut të drejtpërdrejtë nga Irani.
“Sulmi ndaj një vendi të NATO-s nuk është diçka e thjeshtë. Ne jemi të mbrojtur”, u shpreh ai.
Kryeministri hodhi poshtë idenë se Shqipëria është në kundërshtim me Bashkimin Evropian, duke theksuar se nuk ekziston një qëndrim unik i BE-së për konfliktin.
Ai theksoi se Shqipëria mbetet një vend fort pro-evropian, ndërsa njëkohësisht ruan marrëdhënie të ngushta me SHBA-të.
Intervista e plotë
“Le Point”: Në luftën midis koalicionit SHBA-Izrael dhe Iranit, ndërsa shumica e kryeqyteteve evropiane bëjnë thirrje për ulje të tensioneve, pse ju mbështesni vijën e ashpër të Uashingtonit?
Rama: Unë nuk kam zgjedhur një qëndrim rrënjësisht të ndryshëm nga vendet e tjera evropiane, por Shqipëria ka një histori shumë të veçantë të kohëve të fundit me regjimin vrasës në Teheran. Sot, Shqipëria është një nga vendet e pakta që nuk ka marrëdhënie diplomatike me Iranin.
“Le Point”:Ju ishit shënjestër e një sulmi kibernetik iranian në vitin 2022…
Rama: Po. Sulmuesit i përkisnin një grupi të renditur ndër 10 më të mirët globalisht në terrorizmin kibernetik. Pas atij sulmi, vendosëm të ndërpresim të gjitha marrëdhëniet me Iranin. Ky agresion ndodhi sepse ne strehojmë një grup opozitar iranian.
“Le Point”: Ju strehoni rreth 3 000 anëtarë të MEK. Irani e ka quajtur këtë bazë një shënjestër legjitime. A keni frikë?

Rama: Nuk duhet ta pyesni kurrë një shqiptar nëse ka frikë. Ne nuk kemi frikë nga asgjë. Gjatë Luftës së Dytë Botërore, askush nuk i donte hebrenjtë. Ky vend, edhe pse i varfër dhe kryesisht mysliman, u bë streha e tyre. Shqipëria hyri në histori si i vetmi vend evropian që i dha fund luftës me më shumë hebrenj sesa kishte në fillim.
“Le Point”: A ju kërkuan Shtetet e Bashkuara t’i strehonit?
Rama: Po, e bënë dhe ne thamë po. Por, ne gjithashtu strehuam mbi 4 000 afganë pas vitit 2021, kur të tjerët u kthyen shpinën. Në Shqipëri, ne kemi një kod të vjetër: “Zoti juaj dhe miku juaj”. Nëse jeni miku ynë, atëherë ne ju mbrojmë.
“Le Point”: A keni frikë nga kërcënimet nga Irani?
Rama: Ne jemi vend anëtar i NATO-s. Sulmi ndaj një vendi të NATO-s nuk është diçka e thjeshtë. Ne jemi të mbrojtur.
“Le Point”: A rrezikon përafrimi me Washingtonin ta çojë Shqipërinë në përshkallëzim?
Rama: Jo. Së pari, nuk ka një qëndrim të vetëm evropian. Së dyti, kjo ka të bëjë me një vend që shpalli armiqësi ndaj nesh, jo anasjelltas. Së treti, Shqipëria ka përvojën e vet me diktaturën.
“Le Point”: Macron thotë se ndryshimi i regjimit nuk mund të vijë përmes bombave. A jeni në një vijë të ndryshme nga BE-ja?
Rama: Nuk ka një vijë të vetme të BE-së. Nuk po flas për ndryshimin e regjimit, por për ta bërë këtë regjim të paaftë për të sulmuar fqinjët e tij.
“Le Point”: A po vepron në mënyrë efektive koalicioni SHBA-Izrael?
Rama: Absolutisht po.
“Le Point”: A mund të shihet Shqipëria si një “dele e zezë midis kandidatëve të BE-së?

Rama: Shqipëria nuk është në Parlamentin Evropian. Dhe përsëri, nuk ka një qëndrim të unifikuar të BE-së.
“Le Point”: A do të blejë Shqipëria sisteme mbrojtëse evropiane?
Rama: Ne do të blejmë sisteme evropiane, izraelite dhe amerikane çfarëdo që është e nevojshme.
“Le Point”: Po në lidhje me projektin e ishullit të Sazanit të lidhur me Jared Kushner?
Rama: Ne nuk po e privatizojmë ishullin. Shteti shqiptar do të jetë partner në këtë projekt.
“Le Point”: Cilat janë marrëdhëniet tuaja me Jared Kushner?
Rama: E prita atë si një mik amerikan. Personalisht, atë dhe Ivankën i konsideroj të jashtëzakonshëm të përulur dhe të thjeshtë.
“Le Point”: Ju morët pjesë në Bordin e Paqes të Donald Trump. Pse?
Rama: Shqipëria nuk ka marrëdhënie me Rusinë. Por, e gjej shqetësues faktin që Evropa nuk ka mbajtur dialog diplomatik gjatë luftës në Ukrainë.
“Le Point”: Ju e quajtët OKB-në një “gjigant në agoni”…
Rama: Po, dhe shpresoj se kjo do ta shtyjë për reforma. OKB-ja duhet të rishpiket.
“Le Point”: A e bën pjesëmarrja në këtë bord Shqipërinë si një kalë Troje të SHBA-së në Evropë?
Rama: Nuk mendoj kështu. Evropa është ende një vend ku zgjedhjet janë të lira.
“Le Point”: A duhet të flasë Evropa me të gjithë?

Rama: Me të gjithë, përveç terroristëve si regjimi i mullahëve në Iran.
“Le Point”: A do t’i pranonit përsëri shqiptarët e dëbuar nga Franca?
Rama: Gjithmonë. Është shtëpia e tyre.
“Le Point”: Pse duhet ta pranojë BE-ja Shqipërinë?
Rama: Evropa duhet ta përfundojë projektin e themeluesve të saj. Shqipëria mund të jetë e vogël, por është pjesë e ekuilibrit thelbësor të Evropës.
“Le Point”: Po shqetësimet për korrupsionin?
Rama: Këto pretendime pa burime janë pjesë e problemit global të sotëm. Durrësi nuk është një qendër e madhe për pastrimin e parave. Problemet ekzistojnë kudo, jo vetëm këtu.