TRAGJIKE/ I RIU NGA HASI VRET FRANCEZIN NE KSAMIL

Një ngjarje e rëndë ka tronditur Ksamilin në orët e para të mëngjesit, ku një shtetas francez rreth 20 vjeç është gjetur pa shenja jete në zonën e plazhit. Policia dyshon se i riu është vrarë me mjet prerës, pas një konflikti me një 29-vjeçar.

Sipas njoftimit zyrtar të Policisë, ngjarja është regjistruar rreth orës 05:15, në shezlongët e plazhit, përpara një lokali në Ksamil.

Viktima, i identifikuar me inicialet M. M., rreth 20 vjeç, është gjetur i pajetë në zonën e plazhit.

Nga veprimet e para hetimore dyshohet se i riu francez është goditur me thikë, gjatë një konflikti për motive që deri tani janë cilësuar nga autoritetet si të dobëta.

29-VJEÇARI LARGOHET NGA VENDNGJARJA

Si autor i dyshuar i ngjarjes është identifikuar shtetasi Sokol Vata., 29 vjeç, banues në Has.

Sipas Policisë, pas konfliktit dhe goditjes së të riut francez, 29-vjeçari është larguar menjëherë nga vendngjarja.

Pas marrjes së informacionit për ngjarjen, shërbimet e Policisë kanë nisur kontrollet në zonë për lokalizimin dhe kapjen e të dyshuarit, i cili vijon të jetë në kërkim.

Ndërkohë, në vendngjarje kanë mbërritur grupet hetimore, të cilat po mbledhin prova dhe dëshmi për të rindërtuar dinamikën e plotë të ngjarjes.

HETIMET NË DREJTIMIN E PROKURORISË

Grupi hetimor po punon nën drejtimin e Prokurorisë për të përcaktuar rrethanat e konfliktit, mënyrën se si ka ndodhur ngjarja dhe motivin që çoi në përplasjen me pasojë vdekjen e 20-vjeçarit.

Autoritetet po verifikojnë gjithashtu lëvizjet e personave të përfshirë dhe po punojnë për dokumentimin e plotë të ngjarjes.

Deri në përfundimin e hetimeve dhe zbardhjen e plotë të rrethanave, përgjegjësia penale e 29-vjeçarit mbetet një çështje që do të përcaktohet nga organet e drejtësisë.

Policia vijon kërkimet për kapjen e tij, ndërsa hetimet për vrasjen e të riut francez në Ksamil vazhdojnë.