Një 40-vjeçar me origjinë shqiptare ka humbur jetën si pasojë e një aksidenti me motor në qytetin e Fermos në Itali.

Ngjarja ka ndodhur ditën e djeshme (12 maj). Shqiptari ishte duke lëvizur me një shok 39-vjeçar me motor, por ka humbur kontrollin e mjetit dhe për pasojë është përplasur me një shtyllë.

Përplasja ishte fatale, nuk mund të bëhej asgjë për shoferin, ndërsa pasagjeri u transportua në gjendje të rëndë për në spitalin rajonal Torrette në Ankona, raportojnë mediat italiane.

Të paktën 11 persona kanë humbur jetën si pasojë e një aksidenti rrugor në ishullin Java, në Indonezi.

Sipas mediave të huaja, aksidenti ka ndodhur mes qyteteve Depok dhe Lembang.

Autobusi i shkollës, i cili transportonte mbi 60 nxënës dhe mësues, u përplas me një makinë dhe tre motoçikleta.

Në mesin e pasagjerëve të vdekur, ka nëntë gjimnazistë dhe një profesor.

Gjithashtu, janë 13 të plagosur rëndë.

Ish-presidenti Donald Trump njihet për sulmet e vazhdueshme dhe ndonjëherë personale ndaj rivalëve kryesorë, si presidenti Joe Biden. Rishtazi, ai e ka intensifikuar këtë përqasje ndaj kandidatit të pavarur për president Robert F. Kennedy Jr. Trump postoi këtë javë një video rreth katëminutëshe ku e quan zotin Kennedy një kandidat fals të demokratëve dhe një “liberal radikal i majtë” që është nxjerrë si kandidat për të ndihmuar presidentin demokrat. Ish-presidenti Trump sulmoi të gjithë anëtarët e familjes Kennedy, duke i quajtur “një tufë të çmendurish”.

“Ai nuk është republikan, kështu që nuk mendoj se mund të votoni për të dhe të ndiheni mirë”, u tha kandidati i pritshëm për president i Partisë Republikane mbështetësve të tij në rrjetin Truth Social

Bërja e sulmeve të tilla të ashpra ndaj zotit Kennedy mund të jenë një sinjal për shqetësimin e zotit Trump dhe ekipit të tij elektoral për kandidimin e pavarur të zotit Kennedy në një garë elektorale që pritet të jetë e ngushtë dhe kur një kandidat i tretë mund të tërheqë mjaftueshëm vota për të dëmtuar njërin prej kandidatëve kryesorë.

Ndërsa gjendemi gjashtë muaj larg ditës së zgjedhjeve, për të cilat amerikanët kanë shprehur pakënaqësinë e tyre për një ripërballje Trump-Biden, zoti Kennedy është vetëofruar si një alternativë. Disa nga çështjet tek të cilat ai është përqëndruar, si mbështetja e vendosur për Izraelin dhe kritikat ndaj masave izoluese që u bënë për pandeminë, mund të jenë më tërheqëse për votuesit konservatorë, se sa ata demokratë.

Anketimet e deritanishme tregojnë se shumë më tepër republikanë se sa demokratë kanë një opinion të favorshëm për zotin Kennedy, megjithëse shumë amerikanë nuk kanë njohuri të mjaftueshme se çfarë ai përfaqëson. Në një anketim në shkurt të Qendrës për Studime të Çështjeve Publike, të agjencisë së lajmeve Associated Press, mbi gjysma e republikanëve, 53%, kanë opinion më të favorshëm për zotin Kennedy, krahasuar me 30% të demokratëve. Rreth një e katërta e votuesve nga të dyja partitë thanë se nuk dinin mjaftueshëm rreth tij.

Ekipi elektoral i zotit Kennedy thotë se ai rrezikon si zotin Trump ashtu edhe zotin Biden, i cili gëzon mbështetjen e disa anëtarëve të vetë familjes Kennedy dhe e quan “nder të jashtëzakonshëm” mbështetjen e tyre për kandidimin e tij. Presidenti Biden përgjithësisht nuk e përmend zotin Kennedy, i cili në të kaluarën e ka sfiduar si kandidat brenda Partisë Demokrate, përpara se të fillonte fushatën si kandidat i pavarur.

Zoti Kennedy ka sfiduar edhe zotin Trump, duke i kërkuar që të bëjnë një debat gjatë një aktiviteti ku do të marrin pjesë të dy, megjithëse në ditë të ndryshme.

Megjithatë, zoti Kennedy ka sfida të vështira përpara.

Si kandidat i pavarur, emri i tij nuk mund të shfaqet automatikisht në fletëvotime. Atij i duhej të punojë shumë për të siguruar firma për kandidimin në të 50 shtetet, proces për të cilin ka thënë se do ta realizojë brenda verës. Sipas ekipit të tij elektoral, ai e ka arritur këtë tashmë në pesë shtete, në Kaliforni, Dellauer, Miçigan, Oklahoma dhe Jutah, si dhe ka mbledhur firmat edhe për tetë shtete të tjera. Në disa prej këtyre shteteve, zyrtarët zgjedhorë nuk kanë arritur ende të bëjnë verifikimin e firmave.

Zoti Kennedy thotë se pozicionimi i tij i fortë në disa anketime në nivel kombëtar i jep baza për ta konsideruar veten një kandidat konkurues, megjithëse anketimet e këtilla janë përgjithësisht jo shumë të besueshme në një fazë kaq të hershme elektorale.

Krahas dallimeve, ekzistojnë edhe disa çështje për të cilat zoti Kennedy dhe zoti Trump duket se janë në të njëjtën linjë.

Si zoti Trump, edhe zoti Kennedy është një mbështetës i vendosur i Izraelit në luftën ndaj Hamasit. Në prill, ai sugjeroi se procesi hetimor dhe gjyqësor ndaj personave që morën pjesë në sulmin e dhunshëm ndaj Kapitolit në 6 janar 2021, mund të jetë i motivuar politikisht. Ky qëndrim e vendos atë në të njëjtën linjë me zotin Trump dhe aleatët e tij.

Zoti Kennedy bëri megjithatë edhe kritika ndaj zotit Trump, duke thënë se sulmi në Kapitol u bë me “inkurajimin” e zotit Trump dhe “në kontekstin e iluzionit të tij se zgjedhjet ja vodhën”. Sidoqoftë, zoti Kennedy ka thënë se nëse do të bëhej president, ai do të emëronte një prokuror të posaçëm që do të hetonte nëse zoti Trump u përzgjodh politikisht për t’u hetuar.

Zoti Kennedy gjithashtu e ka akuzuar zotin Trump për dëmin ekonomik ndaj klasës së mesme. Zoti Kennedy i quajti masat izoluese gjatë pandemisë “gjëja më e keqe që bëri për vendin”, megjithëse pranoi në të njëjtin fjalim se ish-presidenti Trump “fajësohet për shumë gjëra që nuk i ka bërë”./VOA

Papa Françesku vijon me fushatën e tij për të nxitur italianët që të bëjnë fëmijë. Ati i Shenjtë bën thirrje për politika afatgjata për të ndihmuar familjet dhe duke paralajmëruar se kriza demografike e vendit po kërcënon të ardhmen.

“Numri i lindjeve është treguesi i parë i shpresës së një populli”-tha Françesku në një mbledhje vjetore të grupeve pro-familjare.

Pa fëmijë dhe të rinj, një vend humbet dëshirën për të ardhmen.

Norma e lindjeve në Itali, tashmë një nga më të ulëtat në botë, ka rënë vazhdimisht për rreth 15 vjet dhe ka arritur një rekord të ulët vitin e kaluar me vetëm 379,000 foshnja të lindura. Me mbështetjen e fortë të Vatikanit, qeveria e krahut të djathtë e udhëhequr nga Giorgia Meloni po vijon po ashtu një fushatë për të inkurajuar të paktën 500,000 lindje në vit deri në vitin 2033.

Françesku bëri thirrje për strategji dhe politika politike afatgjata për të inkurajuar çiftet të kenë fëmijë.

Problemi i botës sonë nuk është të lindin fëmijë, është egoizmi, konsumizmi dhe individualizmi që i bëjnë njerëzit të ngopur, të vetmuar dhe të pakënaqur.

Rikujtojmë, se kryeministrja italiane Giorgia Meloni, ka thënë përmes një video-mesazhi se Papa Françesku do të marrë pjesë në takimin e liderëve të Grupit të Shtatë (G7) të ekonomive më të fuqishme të botës, i cili do të zhvillohet nga 13 deri më 15 qershor, në Pulia, në Itali. Është hera e parë që një Papë merr pjesë në një takim të G7. Pjesëmarrja e tij do të ketë të bëjë me një diskutim mbi inteligjencën artificiale. “Falënderoj nga zemra Papa Françeskun për pranimin e ftesës, prania e tij shton vlerë të konsiderueshme për vendin tonë dhe për të gjithë Grupin e Shtatë”-theksoi Meloni.

Në ngjarjen tragjike dhe të pazbardhur ende në detaje, bija 7-vjeçare e Marianne Bachmeier, Anna, ishte gjetur e vdekur më 5 maj 1980.

Klaus Grabowski kishte pranuar vrasjen e pashpjeguar të fëmijës dhe u gjykua për krimin që supozohet se kishte të bënte me abuzim seksual të të miturës tragjike.

Kjo e fundit mohohej nga i akuzuari, por 35-vjeçari kishte një dënim të mëparshëm për ngacmime seksuale ndaj të miturve.

Gjyqi nisi më 4 mars 1981, dhe në ditën e tretë Bachmeier shkoi në gjykatë me një pistoletë Beretta 22-. Ajo qëlloi tetë plumbat nga të cilët gjashtë goditën Grabowski, i cili vdiq në sallën e gjyqit ndërsa Bachmeier u arrestua dhe gjykua për vrasjen e tij.

Gruaja u bë e njohur në Gjermani si “Nëna hakmarrëse” ndërsa debate të ndryshme ngrinin pikëpyetje mbi drejtësinë e ekzekutimit të vrasësit të bijës së saj dhe ndoshta dhe përdhunuesit të të miturës.

Miliona fëmijë zhduken çdo vit në botë të përfshire në rrjete mizore trafiku e abuzimi.

Rrjedhimisht në vitin 1983, Bachmeier u shpall fajtore për vrasje nga pakujdesia dhe u dënua me gjashtë vjet burg, por nëna e fëmijës së vdekur kreu vetëm gjysmën e dënimit.

Një rindërtim video i aktit të hakmarrjes nga Bachmeier në sallën e gjyqit është shfaqur së fundmi në rrjetin YouTube duke bërë që një përdorues të komentonte: “Dhe unë si nënë e tre fëmijëve dhe gjyshe e 4 të tjerëve, do të kisha bërë të njëjtën gjë”.

Një tjetër komentonte: “Kjo nënë ka kaluar aq dhimbje e vuajtje në jetën e saj, po aq sa bija e saj e vogël që është torturuar, prandaj më shumë njerëz duhet të dinë për këtë fenomen”, shkruan rrjeti Ladbible.