Horror/ Nëna adoleshente vret foshnjën e saj dhe e fsheh në dollap

Një vajzë 16-vjeçare nga Nebraska është arrestuar pasi dyshohet se ka vrarë foshnjën e saj të porsalindur duke i prerë fytin, tha policia lokale.

Sipas dokumenteve ligjore të publikuara nga Scottsbluff Star Herald, oficerët iu përgjigjën një shtëpie në Gordon Township të hënën e kaluar pasi morën një telefonatë se një vajzë kishte lindur dhe foshnja nuk po merrte frymë. Babai i adoleshentes iu përgjigj derës dhe u tha oficerëve se ata “arritën shumë vonë”. Ata hynë në shtëpi dhe gjetën nënën e vajzës duke qarë, duke mbajtur në krahë një foshnjë të mbështjellë me një batanije. Vajza e saj adoleshente kishte dëmtuar foshnjën, më pas u pa se i porsalinduri kishte një plagë në trake dhe disa plagë me thikë në gjoks, thuhet në dokumentin e arrestimit. Ekipet e shpëtimit që kishin mbërritur ndërkohë në shtëpi u përpoqën të ndihmonin foshnjën fatkeqe, por ai tashmë kishte vdekur.

Prindërit e adoleshentes i thanë policisë se besojnë se 16-vjeçarja mori një thikë nga kuzhina dhe e përdori për të vrarë të porsalindurin

Thuhet se adoleshentja i tha nënës së saj se duhej të shkonte në supermarket për të blerë peceta higjienike për shkak të menstruacioneve. Pak më vonë gruaja hyri në dhomën e gjumit të së bijës dhe pa shumë gjak në dysheme dhe në mur. Kur vajza u kthye rreth 15 minuta më vonë, nëna e saj kërkoi një shpjegim dhe ajo dyshohet se pranoi se e kishte vrarë foshnjën. Babai i 16-vjeçares, sipas dokumentit ligjor, e ka gjetur foshnjën në një dollap.

Është e paqartë nëse prindërit e vajzës e dinin se vajza e tyre ishte shtatzënë përpara se të shihnin skenën e tmerrshme.

Adoleshentja, emri i së cilës nuk bëhet i ditur për shkak të moshës së saj, u dërgua në Qendrën Mjekësore Rajonale Perëndimore, ku iu nënshtrua një operacioni, sipas Star Herald.