Rusia tha se dërgimi i trupave të NATO-s në Ukrainë potencialisht do të përbënte një rrezik të madh, duke shtuar se Moska po vëzhgon me kujdes një peticion ukrainas për një ndërhyrje të tillë.

Peticioni, i publikuar në ueb-faqen e presidentit të Ukrainës, thuhet se Ukraina duhet t’i kërkojë Shteteve të Bashkuara, Britanisë dhe shteteve të tjera që të dërgojnë trupa për ta ndihmuar Kievin që të zmbrapsë pushtimin rus.

“Regjimi i Kievit është shumë i paparashikueshëm”, tha zëdhënësi i Kremlinit, Dmitry Peskov, kur u pyet për këtë çështje gjatë një konference për media më 8 maj.

“Ne vazhdimisht e kemi thënë se një ndërhyrje e drejtpërdrejtë në terren në këtë konflikt nga ushtritë e shteteve të NATO-s bart një rrezik të madh potencial. Prandaj, ne e konsiderojmë këtë si një provokim të madh dhe sigurisht po e vëzhgojmë situatën me shumë kujdes”, shtoi ai.

Është e paqartë nëse peticioni do të mbledhë votat e nevojshme – 25.000 – që kërkon në mënyrë që presidenti ukrainas, Volodymyr Zelensky, ta miratojë apo refuzojë. Deri mëngjesit e 8 majit, këtë peticion e kanë nënshkruar 1.594 persona.

NATO e ka mbështetur Ukrainën në luftë, duke i ofruar armë të fuqishme, përfshirë tanke dhe raketa me rreze të gjatë veprimi, por nuk ka ndërhyrë drejtpërdrejtë me trupa, diçka që presidenti amerikan, Joe Biden, dhe ai rus, Vladimir Putin, kanë paralajmëruar se do të çonte në një Luftë të Tretë Botërore.

Presidenti i Francës, Emmanuel Macron, ka thënë se dërgimi i trupave perëndimore në Ukrainë “do të ishte legjitim” nëse Rusia do të kalonte vijat ukrainase të frontit dhe nëse Kievi do të kërkonte një gjë të tillë.

Zëdhënësja e Ministrisë së Jashtme ruse, Maria Zakharova, tha më 8 maj se Rusia do të shënjestronte trupat franceze nëse ato do të dërgoheshin në Ukrainë, shtet që po përballet me pushtimin që Moska nisi më 2022.

Presidentja e Komisionit Evropian, Ursula von der Leyen, akuzoi partinë AfD se po “tradhton” Gjermaninë, përderisa partia e ekstremit të djathtë është duke u përballur me skandale para zgjedhjeve për Parlamentin Evropian.

Alternativa për Gjermaninë (AfD) muajin e kaluar u përball me një skandal, pasi një këshilltar parlamentar i kandidatit kyç të partisë për zgjedhjet evropiane – që mbahen në qershor – u arrestua nën dyshimin se ka spiunuar për Kinën.

Kandidati, Maximilian Krah, po ashtu më herët është përfshirë në pretendimet e propagandës ruse.

Sjellja e AfD-së është “në mënyrë shkatërruese e pandershme”, tha von Cramon gjatë kongresit të partisë së saj të Unionit Kristiano Demokrat, që u mbajt në Berlin.

Sipas saj, AfD-ja “po bën propagandë për [presidentin rus, Vladimir] Putin dhe po spiunon për Kinën” para zgjedhjeve evropiane.

“Fillimisht, AfD-ja ankohet për njerëzit dhe atdheun, më pas AfD-ja tradhton po këtë atdhe tek autokratët. Duhet t’iu vije turp”.

Sipas von Cramon, programi i partisë së ekstremit të djathët për zgjedhjet evropiane do të shkatërronte vende të punës dhe e akuzoi AfD-në se po dëshiron që ta nxjerrë Gjermaninë nga BE-ja.

Von der Leyen, ish-ministrja gjermane e Mbrojtjes, po kërkon një mandat të dytë në postin e shefes së KE-së.

Sipas sondazheve, AfD-ja është në mesin e disa partive të ekstremit të djathtë në mbarë Evropën që pritet të dalin mirë në zgjedhje./REL

Presidenti kinez Xi Jinping u largua nga Franca të martën pas një udhëtimi dy-ditor gjatë të cilit ai nuk ofroi lëshime të mëdha mbi tregtinë apo politikën e jashtme, edhe pse Presidenti Emmanuel Macron e shtyu atë për aksesin në treg dhe Ukrainën. Macron dhe gruaja e tij Brigitte u përshëndetën me Xi dhe gruan e tij Peng Liyuan në aeroportin në rajonin jugperëndimor të Pirenejve të Francës, pasi i çuan për drekë në male, kjo pas një dite bisedimesh dhe pompoziteti shtetëror në Paris të hënën.

Një burim i afërt me presidencën franceze tha se udhëtimi mundësoi “bisedime miqësore dhe shumë të sinqerta” që lejuan Macron të transmetonte mesazhe për Ukrainën dhe do të lejonte bisedime më të hapura në të ardhmen. Macron ka një histori përpjekjesh për të krijuar marrëdhënie personale jashtë protokollit në përpjekje jo gjithmonë të suksesshme për të marrë më shumë nga udhëheqës të tjerë. Pasi panë kërcimtarët tradicionalë të performonin nën majat me borë, dy çiftet presidenciale hëngrën proshutë, mish qengji, djathë dhe kekë me boronica të rritura në vend. Xi tha se do t’i bënte proshutës pak publicitet dhe lavdëroi djathin.

Macron i dha Xi-t një batanije leshi të bërë në Pirenej, një fanellë çiklizmi ‘Tour de France’ dhe armagnac nga rajoni i afërt jugperëndimor, një raki në rrezik nga sanksionet tregtare kineze. Macron i bëri presion Xi gjatë gjithë vizitës së tij për të reduktuar çekuilibrin tregtar, me akses më të mirë për firmat evropiane në Kinë dhe më pak subvencione për eksportuesit kinezë, dhe për të rënduar presidentin rus Vladimir Putin për Ukrainën.

Xi tha se ai do të mirëpriste më shumë bisedime të nivelit të lartë mbi fërkimet tregtare, por mohoi se kishte një “problem të mbikapacitetit” kinez, duke hedhur dyshime mbi përparimin që mund të arrihet. Kompanitë franceze dhe kineze përfunduan disa marrëveshje të hënën, duke filluar nga energjia, financat dhe transporti, por shumica ishin marrëveshje për bashkëpunim ose angazhime të rinovuara për të punuar së bashku.

“Xi ishte i qëndrueshëm në sinjalizimin e vullnetit të mirë ndaj bashkëbiseduesve (të tij) francezë, por nuk erdhi me lëshime të prekshme për çështjet që kanë më shumë rëndësi,” tha Mathieu Duchatel i institutit Montaigne.

FITUES?

Në shenjë përparimi në bujqësi, Kina do të lejojë me efekt të menjëhershëm importet e ushqimit me proteina si dhe të brendshmet e derrit nga Franca. Prodhuesit francezë të derrit thanë se marrëveshja e të brendshmeve duhet të rrisë eksportet e derrit me 10%. Një diplomat evropian tha se Xi ishte “fituesi” i vizitës, pasi shtroi imazhin e tij si “sundimtari i botës” ku perëndimorët po i luten që të zgjidhë problemet evropiane në Ukrainë. Hosuk Lee-Makiyama, drejtor i grupit të ekspertëve ECIPE me bazë në Bruksel, tha se vizita ka të ngjarë më pak për të bërë përparim konkret në tregti sesa për të krijuar një hapësirë ​​​​politike që mund t’u nevojitet nëse Donald Trump kthehet në Shtëpinë e Bardhë pas zgjedhjeve të nëntorit në SHBA.

STILI MACRON

Dy çiftet udhëtuan me fluturime të ndara nga Parisi dhe morën makina të ndara në male. Ftesat për në Pirenej për Xi megjithatë u krahasua si e ngjashme me qëndimin e Trump me Macron në 2017 për të parë paradën e Ditës së Bastiljes dhe udhëtimin e presidentit rus Vladimir Putin në vitin 2019 në tërheqjen verore të kështjellës së presidentit francez Bregancon në Francën juglindore.

“Emmanuel Macron tentoi këtë diplomaci narcisiste të ‘Unë i bëj lajka tiranit’ me Vladimir Putinin për pesë vjet, me fortesën Bregancon … shoqërinë,” i tha radios RTL Raphael Glucksmann, i cili drejton biletën e Parlamentit Evropian të socialistëve francezë.

Prodhuesit francezë të konjakut u mblodhën të martën ndërsa Xi prezantoi atë që Macron e përshkroi si një “qëndrim të hapur” ndaj një mosmarrëveshjeje tregtare midis dy vendeve. Një burim diplomatik francez tha se Kina nuk do të vendosë taksa ose detyrime doganore për konjakun francez, në pritje të hetimit. Xi nuk e komentoi këtë gjatë deklaratave të tij të shumta publike të hënën./ Reuters

“AstraZeneca” ka nisur tërheqjen në mbarë botën të vaksinës së saj anti-Covid pasi kompania ka deklaruar se ka një tepricë të vaksinave në dispozicion. Në një deklaratë, “AstraZeneca” tha se vendimi u mor sepse tani ka një shumëllojshmëri të vaksinave më të reja në dispozicion që janë përshtatur për të synuar variantet e Covid-19. Kjo kishte çuar në një rënie të kërkesës për vaksinën “AstraZeneca”.

“Meqenëse janë zhvilluar disa variante të Covid-19, ka një tepricë të vaksinave të disponueshme,” tha kompania, duke shtuar se kjo kishte çuar në një rënie të kërkesës për Vaxzevrian (kështu quhet vaksina anti-Covid e “AstraZeneca”), e cila nuk po prodhohet më.

Më tej, në njoftim thuhet se mbi 6.5 milionë jetë janë shpëtuar vetëm vitin e parë të përdorimit të vaksinës, si dhe mbi 3 miliardë doza janë shpërndarë globalisht.

Bjellorusia i ka filluar të martën stërvitjet ushtarake me raketat dhe avionët luftarakë që janë në gjendje të bartin armë taktike bërthamore, të cilat aleatja e saj e ngushtë, Rusia, i zhvendosi atje kohë më parë.

Ushtrimet ushtarake të Bjellorusisë filluan vetëm një ditë pasi Rusia njoftoi se synon të kryejë stërvitje të ngjashme për simulimin e përdorimit të armëve bërthamore të fushëbetejës, si përgjigje ndaj deklaratave të zyrtarëve perëndimorë, për të cilat thotë se janë shenjë se Perëndimi mund të përfshihet më shumë në luftën në Ukrainë.

Kjo ishte hera e parë që Moska ka njoftuar publikisht për një ushtrim të tillë.

Ministri i Mbrojtjes i Bjellorusisë, Viktor Khrenin, tha se një njësit i raketave me rreze të mesme veprimi, Iskander, dhe një skuadrilje e avionëve luftarakë, Su-25, do të marrin pjesë në stërvitje.

Këto stërvitje nisën gjithashtu në ditën kur presidenti i Rusisë, Vladimir Putin, e bëri betimin për mandatin e tij të pestë të martën, duke u zotuar për garantimin e sigurisë së Rusisë.

Vitin e kaluar, Rusia i zhvendosi disa armë të veta taktike bërthamore në Bjellorusi, e cila kufizohet gjithashtu edhe me Ukrainën dhe anëtaret e NATO-s, Poloninë, Letoninë dhe Lituaninë.

Presidenti autoritar i Bjellorusisë, Alyaksandr Lukashenka, mbështetet në lidhjet e ngushta me Rusisë dhe e ka ofrur vendin e vet si terren strategjik për luftën në Ukrainë.

Moska ka nënvizuar se armët taktike bërthamore të zhvendosura në Bjellorusi mbesin nën kontrollin ushtarak të Rusisë.

Zhvendosja e armëve taktike bërthamore në Bjellorusi, e cila ndan një vijë kufitare prej 1.084 kilometrash me Ukrainën, do t’ia mundësonte raketave dhe avionëve luftarakë rusë ta arrijnë cakun e tyre të mundshëm atje me më shumë lehtësi dhe shpejtësi, nëse Moska vendos t’i përdorë ato.

Gjithashtu ia mundëson Rusisë t’i godasë më lehtë disa aleatë të NATO-s në Evropën Lindore dhe atë Qendrore.

Për dallim nga raketat interkontinentale balistike bërthamore, të cilat mund të shkatërrojnë qytete të tëra, armët taktike bërthamore, të dizajnuara për t’u përdorur kundër trupave në fushëbeteja, janë më pak të fuqishme.