Pulisic kërkon të largohet nga Milan-i nëse Conceiçao qëndron

Ylli i Milan-it, Christian Pulisic thuhet se nuk është më në marrëdhënie të mira me trajnerin Sergio Conceiçao dhe ka kërkuar të largohet nga klubi në verë nëse portugezi mbetet në krye, raporton gazeta “La Repubblica”.

Tensioni është i lartë në Milano, veçanërisht pas eliminimit nga Champions League të martën nga Feyenoord-i.

“La Repubblica” konfirmon se Pulisic-i është i pakënaqur me Conceiçao-n, duke shtuar se dyshja patën një debat ballë për ballë pas humbjes së Milan-it ndaj Dinamo Zagrebit në janar, në ndeshjen e fundit të fazës së ligës të Champions League.

Gazeta italiane pretendon se marrëdhënia e Pulisic-it me Conceiçao-n u shkatërrua në mënyrë të pariparueshme.

Sipas raportit, Pulisic-i dhe lojtarë të tjerë të Milan-it, përfshirë Youssouf Fofana-n, “nuk i vlerësojnë metodat e vështira të trajnerit”.

Conceiçao nënshkroi një kontratë deri në qershor 2026 në dhjetor, por Milan-i ka një opsion për të ndërprerë marrëveshjen në fund të sezonit.

Raporti gjithashtu thekson se Conceiçao nuk do të qëndrojë në “San Siro” përtej verës nëse nuk arrin të kualifikohet për në Champions League 2025-26.