Rrjeti “The Com”, kërcënimi i ri global që synon fëmijët dhe adoleshentët në internet

Europol ka paralajmëruar për rritjen e rrezikut që paraqet rrjeti ekstremist “The Com”, një strukturë e decentralizuar grupesh ekstremiste me ideologji nihiliste, e cila përdor internetin për të rekrutuar, manipuluar dhe shantazhuar të mitur.

Në kuadër të një operacioni disajavor gjatë qershorit dhe korrikut 2026, Europol dhe autoritetet e nëntë vendeve evropiane identifikuan dhe raportuan për heqje 4.340 adresa URL që përmbanin materiale të lidhura me këtë rrjet. Në operacion morën pjesë Belgjika, Finlanda, Hungaria, Irlanda, Luksemburgu, Holanda, Portugalia, Spanja dhe Suedia, së bashku me Njësinë e Referimit në Internet të Europol (EU IRU) dhe qendrën spanjolle kundër terrorizmit dhe krimit të organizuar (CITCO).

Sipas Europol, objektivi ishte dobësimi i infrastrukturës digjitale të “The Com”, kufizimi i përhapjes së propagandës ekstremiste dhe identifikimi i provave të reja për aktivitetet e rrjetit.

“The Com”, emër që vjen nga fjala “Community” (Komuniteti), nuk ka një strukturë të centralizuar apo një ideologji të vetme. Megjithatë, grupet që e përbëjnë ndajnë një botëkuptim nihilist dhe mizantrop, ku dhuna konsiderohet qëllim në vetvete.

Europol thekson se disa prej këtyre grupeve synojnë të përshpejtojnë destabilizimin e shoqërisë përmes sulmeve të dhunshme dhe korrupsionit të të rinjve. Rekrutimi kryhet kryesisht në rrjetet sociale, aplikacionet e komunikimit dhe platformat e lojërave online, ku viktimat joshen ose manipulohen për t’u përfshirë në vetëlëndim, torturim kafshësh, sulme të dhunshme dhe prodhim të materialeve të abuzimit seksual ndaj fëmijëve.

Sipas autoriteteve evropiane, të miturit që bien në kontakt me rrjetin shpesh mbahen nën kontroll përmes shantazhit, përfshirë edhe shantazhin seksual. Përmbajtja ekstremiste shpërndahet fillimisht në platforma të hapura për të tërhequr viktima të reja, të cilat më pas drejtohen në forume dhe dhoma private komunikimi ku zhvillohet procesi i radikalizimit.

Materialet e shpërndara nga “The Com” përfshijnë video dhe fotografi me vetëlëndime, vetëvrasje, materiale të abuzimit seksual ndaj fëmijëve (CSAM), torturim kafshësh, sulme të dhunshme dhe zjarrvënie. Rrjeti publikon gjithashtu udhëzues që, sipas Europol, përmbajnë instruksione për manipulimin e të miturve, kryerjen e sulmeve të dhunshme, prodhimin e mjeteve shpërthyese artizanale, si edhe teknika të shantazhit dhe sulmeve kibernetike.

Ndër praktikat e përdorura janë edhe “doxing”, publikimi i të dhënave personale të viktimave për t’i kërcënuar ose shantazhuar, si dhe “swatting”, një metodë që konsiston në njoftime të rreme emergjente drejtuar policisë për të shkaktuar ndërhyrje të forcave speciale në adresën e viktimës, duke rrezikuar jetën e saj dhe të familjes.

Europol bëri të ditur se operacioni është pjesë e projektit COMPASS, të koordinuar nga Qendra Evropiane Kundër Terrorizmit (ECTC), dhe lidhet me strategjinë e Bashkimit Evropian ProtectEU për luftën kundër terrorizmit dhe ekstremizmit të dhunshëm në internet.

Në raportin EU TE-SAT 2026, nihilizmi ekstremist përshkruhet si një ideologji destabilizuese që synon minimin e strukturave shoqërore. Sipas Europol, gjatë dy viteve të fundit rrjeti “The Com” është shndërruar në një kërcënim global, veçanërisht për të miturit, të cilët përdoren si viktima, por në disa raste edhe si autorë të veprave penale.