Resortet në zonat e mbrojtura, SPAK regjistron kallëzimin penal për “Albanian Files” të Ramës

SPAK ka regjistruar një procedim penal pas kallëzimit të depozituar më 12 gusht 2025 nga një grup ekspertësh dhe protestuesish, lidhur me projektet turistike në zonat e Zvërnecit, Rrjollit dhe Divjakë-Karavastasë. Sipas burimeve, hetimi është regjistruar për disa vepra penale, por deri më tani nuk ka persona të identifikuar zyrtarisht si të dyshuar apo nën hetim.

Kallëzimi i drejtohet kryeministrit Edi Rama, funksionarëve të tjerë publikë dhe subjekteve private që lidhen me projektet turistike në këto zona. Si bazë për pretendimet janë përdorur materialet e njohura si “The Albanian Files”, që përmbajnë të dhëna mbi resortet e planifikuara në zona të mbrojtura, si dhe “Dosjet e KKT-së”, një bazë të dhënash me 252 vendime të Këshillit Kombëtar të Territorit.

Në kallëzim kërkohet hetim për shpërdorim detyre, ushtrim të ndikimit të paligjshëm ndaj funksionarëve publikë, korrupsion pasiv të funksionarëve të lartë dhe krijim të grupit të strukturuar kriminal.

Kallëzuesit pretendojnë se në këto projekte është ndjekur një skemë e përsëritur: fillimisht ndryshohen dispozitat ligjore, më pas miratohet një instrument i posaçëm planifikimi dhe në vijim jepet leja nga Këshilli Kombëtar i Territorit, i drejtuar nga kryeministri.

Në fokus të kallëzimit janë tre projekte kryesore: Baks-Rrjoll, Divjakë-Karavasta dhe Zvërneci. Megjithatë, grupi i kallëzuesve i kërkon SPAK që hetimi të shtrihet edhe në projekte të tjera dhe të mos kufizohet vetëm në këto raste. Deri në këtë fazë, pretendimet e ngritura në kallëzim nuk përbëjnë konstatime të provuara penalisht.