Mënyra si flasin fëmijët mund të sinjalizojë rrezikun për ankth dhe depresion

Mënyra se si fëmijët tregojnë për përvojat e vështira mund të japë sinjale të rëndësishme për gjendjen e tyre emocionale. Një studim i ri nga Universiteti Stanford sugjeron se jo vetëm ngjarjet traumatike, por edhe mënyra e rrëfimit të tyre mund të lidhet me rrezikun për zhvillimin e ankthit apo depresionit gjatë adoleshencës.

Studiuesit analizuan bisedat e më shumë se 200 fëmijëve të moshës 9 deri në 13 vjeç, duke përdorur inteligjencën artificiale për të vlerësuar mënyrën e përdorimit të gjuhës. Sipas rezultateve, disa modele të të folurit mund të ndihmojnë në parashikimin e fëmijëve që mund të përballen me vështirësi emocionale në të ardhmen.

Studimi evidentoi se përdorimi i shpeshtë i fjalëve absolute si “gjithmonë” dhe “kurrë”, si edhe rrëfimet më komplekse dhe të ngarkuara emocionalisht, mund të lidhen me një rrezik më të lartë. Në të kundërt, fëmijët që flasin më shumë për marrëdhëniet me njerëzit e afërt, aktivitetet e preferuara, sportin apo kafshët shtëpiake, shfaqin më shumë tregues pozitivë emocionalë.

Ekspertët theksojnë se prindërit nuk duhet të interpretojnë çdo fjalë të fëmijëve si një shenjë alarmi, por të jenë të vëmendshëm ndaj mënyrës se si ata shprehin ndjenjat dhe përvojat e tyre.

Sipas studiuesve, analiza e gjuhës përmes teknologjisë mund të kthehet në një mjet të thjeshtë dhe me kosto të ulët për identifikimin e hershëm të fëmijëve që mund të kenë nevojë për mbështetje emocionale, duke mundësuar ndërhyrjen në kohë.