ERDOGAN GJEN NJE TJETER SHOK LUFTE-ALEANCA

Presidenti i Turqisë, Recep Tayyip Erdogan, deklaroi se shpreson që më shumë vende t’i bashkohen marrëveshjes së mbrojtjes të nënshkruar javën e kaluar mes Turqisë, Arabisë Saudite dhe Pakistanit, me synimin për të forcuar stabilitetin në një rajon të tronditur nga konfliktet.

Marrëveshja e Përbashkët e Mbrojtjes e Mekës u nënshkrua të premten, në një kohë kur Lindja e Mesme po përballet me pasojat e luftës mes Shteteve të Bashkuara dhe Iranit, e cila ka përfshirë aktorë rajonalë dhe ka shkaktuar ndërprerje të lundrimit në Ngushticën e Hormuzit dhe Detin e Kuq.

“Vizioni ynë për këtë marrëveshje nuk kufizohet vetëm te këto tri vende”, tha Erdogan për të përditshmen londineze Asharq Al-Awsat.

“Përkundrazi, ne synojmë që ajo të zgjerohet dhe një ditë mund të krijohen kushtet e përshtatshme që të gjitha vendet e rajonit të bashkohen nën ombrellën e saj”, shtoi presidenti turk.

Ministri i Jashtëm, Hakan Fidan, deklaroi të shtunën se Turqia pret që Egjipti t’i bashkohet paktit “në fazën e ardhshme”, duke thënë se mbeten për t’u zgjidhur vetëm “disa çështje teknike”.

Paketa përmban një klauzolë të ngjashme me atë të NATO-s, sipas së cilës një sulm ndaj njërit prej vendeve anëtare do të konsiderohet sulm ndaj të gjithëve.

Erdogan tha se marrëveshja lindi nga “rrethanat e reja” në Lindjen e Mesme, ndërsa aktorët rajonalë po kërkojnë të marrin më shumë përgjegjësi për sigurinë dhe stabilitetin e tyre.

“Çështjet rajonale duhet të zgjidhen nga aktorët rajonalë dhe, me këtë nismë, besojmë se kemi hedhur hapin e parë drejt arritjes së këtij objektivi”, deklaroi ai.

“Ne e dimë shumë mirë se zgjidhjet e importuara nga jashtë sjellin vetëm katastrofa”, shtoi Erdogan.

Paketi mes tri vendeve, të cilat janë aleate të rëndësishme të Shteteve të Bashkuara, synon gjithashtu forcimin e bashkëpunimit në fushën e sigurisë dhe hapjen e rrugës për “zhvillimin e projekteve të përbashkëta në industritë e mbrojtjes”.

Erdogan sinjalizoi gjithashtu një afrim të mëtejshëm me Arabinë Saudite, duke deklaruar se Ankaraja dhe Riadi do të ndërmarrin hapa që do t’i çojnë marrëdhëniet dypalëshe “në një nivel shumë më të lartë”.