Funerali i kasapit të Ballkanit ndez Rajonin/ Plenkoviç: Serbia po i mbyll dyert e BE-së

Kryeministri kroat Andrej Plenkoviq ka reaguar ashpër ndaj mundësisë që ish-komandanti i Ushtrisë së Serbëve të Bosnjës, Ratko Mladiq, të varroset me nderime shtetërore dhe ushtarake në Serbi.

Nga Forumi Strategjik i Bledit në Slloveni, Plenkoviq tha se kishte dëgjuar për një ceremoni të mundshme shtetërore, megjithëse një vendim përfundimtar ende nuk është marrë.

Kryeministri kroat e cilësoi Mladiqin si kriminel lufte dhe e akuzoi atë për përgjegjësi në disa prej krimeve më të rënda të kryera gjatë luftërave të viteve ’90.

“Mladiq është një kriminel lufte”, deklaroi Plenkoviq, duke theksuar se një funeral me nderime shtetërore do të kishte pasoja të forta politike për Serbinë.

Mesazhi i tij ishte i drejtpërdrejtë edhe për aspiratat evropiane të Beogradit.

“Është sikur po i mbyllin dyert e Bashkimit Evropian për veten e tyre”, tha Plenkoviq.

Debati është ndezur pas deklaratës së ministrit serb të Drejtësisë, Nenad Vujiq, i cili kishte deklaruar se Mladiqi do të varrosej me nderimet më të larta shtetërore dhe ushtarake.

Por presidenti serb Aleksandar Vuçiq e ka mohuar se është marrë një vendim i tillë, duke thënë se çështja e funeralit ende nuk është vendosur nga familja e Mladiqit.

Ratko Mladiq u dënua përfundimisht me burgim të përjetshëm për gjenocid, krime kundër njerëzimit dhe krime lufte gjatë luftës në Bosnje dhe Hercegovinë. Vendimi përfundimtar ndaj tij u dha në vitin 2021 nga mekanizmi gjyqësor i Kombeve të Bashkuara.

Reagimi i Plenkoviq vjen në një klimë të tensionuar politike në rajon, ku çështja e trashëgimisë së luftërave të viteve ’90 dhe qëndrimi ndaj figurave të dënuara për krime lufte vazhdon të ndikojë në marrëdhëniet e vendeve të Ballkanit me Bashkimin Evropian.

Kroacia kishte reaguar edhe ndaj një tjetër zhvillimi, pasi kryetari i Kuvendit të Malit të Zi, Andrija Mandiq, i kishte shprehur ngushëllime familjes së Mladiqit. Zagrebi e cilësoi atë veprim si të papajtueshëm me rrugën evropiane të Malit të Zi.