Më ofruan 40 milionë dollarë për të mos folur/ Nëna e fëmijëve të Elon Musk zbulon…

Një deklaratë e bujshme ka tronditur konferencën për shtyp në Festivalin e Filmit të Venecias. Ashley St. Clair, nëna e njërit prej fëmijëve të Elon Musk, pretendon se ka refuzuar një marrëveshje prej 40 milionë dollarësh, që sipas saj lidhej me heshtjen e saj publike.

28-vjeçarja foli për gazetarët në ditën kur në Venecia u shfaq premierë dokumentari “Musk”, i regjisorit Alex Gibney, ku St. Clair është intervistuar gjerësisht.

“Më ofruan mundësinë të mos flisja për 40 milionë dollarë”, deklaroi ajo, duke shtuar se një ofertë e tillë e bëri të reflektonte mbi peshën dhe vlerën e fjalëve të saj.

Sipas St. Clair, pikërisht shuma e ofruar për të mos folur e shtyu atë të pyeste se përse dikush do të ishte i gatshëm të paguante një shumë kaq të madhe për heshtjen e saj.

“Dua të jem shembull për fëmijët e mi: nuk duhet të ndihesh kurrë në siklet kur thua të vërtetën”, u shpreh ajo.

Dokumentari i Alex Gibney, rreth katër orë i gjatë, trajton aspekte të shumta të jetës personale dhe profesionale të Musk, nga familja dhe marrëdhëniet e tij, te kompanitë, beteja të ndryshme publike dhe përfshirja gjithnjë e më e madhe në politikë dhe rrjetet sociale.

Ashley St. Clair, e cila ka një djalë me Musk, është tashmë një kritike e hapur e miliarderit. Mes tyre vijon edhe një betejë ligjore për kujdestarinë e fëmijës.

Duke folur për të kaluarën e saj, St. Clair pranoi se kishte qenë naive dhe se kjo, sipas saj, nuk e justifikon rolin që kishte në atë periudhë.

Ajo tha se tani ka zgjedhur të flasë hapur, edhe pse e konsideron këtë një rrezik personal, me shpresën se rrëfimi i saj mund të ketë një ndikim pozitiv.

St. Clair kishte deklaruar edhe më herët se i ishte ofruar një shumë shumë e madhe parash, e shoqëruar me një marrëveshje konfidencialiteti, në këmbim të mosdaljes së saj publike.

Një pretendim prej 40 milionë dollarësh, një marrëveshje heshtjeje dhe një dokumentar që hap siparin mbi jetën e Elon Musk – Venecia u kthye në skenën e një prej rrëfimeve më të bujshme rreth miliarderit amerikan.