DIKUR E KRAHASUAT ME GEORGE WASHINGTONIN/ Vlora Çitaku sfidon Amerikën dhe Britaninë

Qëndrimi i Shteteve të Bashkuara dhe Britanisë së Madhe pas vendimit të Gjykatës Speciale në Hagë ka shkaktuar reagime në Kosovë.

Deputetja e PDK-së, Vlora Çitaku, ka kundërshtuar thirrjet e aleatëve ndërkombëtarë për respektimin e aktgjykimit të shkallës së parë ndaj katër ish-krerëve të UÇK-së dhe përdorimin e mekanizmave ligjorë të ankimit.

Çitaku ka deklaruar se Hashim Thaçi, Kadri Veseli, Jakup Krasniqi dhe Rexhep Selimi nuk janë thjesht figura të një periudhe të kaluar, por, sipas saj, pjesë e historisë së Kosovës dhe e procesit të shtetndërtimit.

Ajo është ndalur veçanërisht te raporti i Hashim Thaçit me Shtetet e Bashkuara dhe aleatët e tjerë perëndimorë, duke kujtuar bashkëpunimin e tij me ta që në fillimet e angazhimit politik.

Sipas Çitakut, Thaçi dikur ishte vlerësuar nga partnerët ndërkombëtarë në nivele të larta, deri edhe në krahasime me figura historike amerikane si George Washington.

“Paskan filluar të reagojnë aleatët historikë të Hashim Thaçit. Ata me të cilët ai punoi që nga dita e parë. Ata me të cilët, bashkë, arritëm shumë suksese e momente historike. E tash paskan filluar të na thonë: pranojeni vendimin, sepse ka apel”, është shprehur Çitaku.

Ajo e kundërshton qasjen se vendimi duhet pranuar si i drejtë vetëm për shkak se ekziston mundësia e apelimit.

Për deputeten e PDK-së, katër ish-krerët e UÇK-së janë pjesë e një prej kapitujve kryesorë të historisë së Kosovës.

“Për ne, ata nuk janë thjesht personazhe të një kapitulli të kaluar. Për ne, ata janë pjesë e historisë sonë. Janë pjesë e themeleve mbi të cilat është ngritur shteti ynë”, ka deklaruar ajo.

Në fund, Çitaku e ka bërë të qartë se qëndrimi i saj politik dhe i mbështetësve të ish-krerëve të UÇK-së është kundërshtimi i vendimit të shkallës së parë.

“Ne nuk e pranojmë këtë vendim. Do ta kundërshtojmë. Do të rezistojmë. Deri në fund. Deri në liri”, ka shkruar ajo.

Deklarata vjen pasi SHBA-ja dhe Britania e Madhe kanë bërë thirrje për respektimin e vendimit të Dhomave të Specializuara dhe përdorimin e procedurave të apelit, duke theksuar se aktgjykimi është ende i shkallës së parë.

Në Hagë, Hashim Thaçi dhe Jakup Krasniqi janë dënuar me nga 25 vite burgim, Kadri Veseli me 18 vite dhe Rexhep Selimi me 13 vite.

Tashmë pritet faza e apelimit, ndërsa beteja politike dhe publike në Kosovë rreth vendimit të Hagës duket se do të vazhdojë.